Donald Trumpip Nato pillugu oqaaseqarnera Det Hvide Husimit paatsiveerusimanermik aallaaveqartutut taaneqarpoq

Amerikami præsidentiusimasup Donald Trumpip arfininngornermi qinersisartunik ataatsimiisitsinermi Nato aamma Rusland pillugu oqaaseqarnera præsidentip illorsuanit Det Hvide Hus-imit isumaqatigineqanngilaq. 

Det Hvide Husimi oqaaseqartartoq Andrew Bates taama oqarpoq.

-Illersoqatigiinnik tiguaanissamik kaammattuuteqarneq amiilaarnartuuvoq paatsiveerusimanermillu aallaaveqarluni, oqaaseqartartoq taama oqarpoq.

Trump taama oqaaseqarpoq naalagaaffimmi South Carolinami qinersisartunik ataatsimiisitsinermi, præsidentiunermilu nalaani  Natomi siuttunik ataatsimeeqateqarluni oqaaserisimasani uteqqillugu.

- Nunarujussuarmi præsidenti nikueriarluni ima  oqarpoq. “ Akiliinngikkutta Ruslandimiillu saassunneqarluta – illersussavisigut?.

- Oqarpunga: “ Akiliinngilatit ^? taannalu oqarpoq:  Aap oqariarta akiliisimalluta, “ Naamik illersorusunngilakkit. Qanorsuarluunniit iliornissaannik kaammattorusuppakka. Akiliisariaqarputit” Trump taama oqarsimavoq.

Russit saassussinissaannik ernumaneq

Europami  Natomi ilaasortat sakkutooqarnikut aningaasartuutitik qaffassagaat, præsidentiusimasup arlaleriarluni kaammattuutigisarpaa imminut illersorsinnaaniassammata USA-miillu isumalluuteqarunnaarlutik.

Rusland Ukrainemut februaarimi 2022-mi saassussilluni aallartimmalli nunat Natomi ilaasortat, taakkununnga illaalluni Danmark, sakkutooqarnikkut missingersuutiminit arlaleriarlutik aningaasaliipput.

Naalagaaffimmi tunisat ataatsimut nalingisa to procentiat Natomi ilaasortat illersornissaqarfinnut akiliutigisassagaat Natomi anguniagaavoq.

Anguniagaq tamanna Danmarkimit ukiuni arlaqartuni  piviusunngortinneqarsimanngilaq.

 Siorna illersornissamut isumaqatigiissuteqartoqarmat  ukioq  2024-mit 2033-mut atuuttussami 155 milliarder koruunit isumaqatigiissutigineqarmata, Natomi anguniaq piviusunngorsinnaanissaa naatsorsuutigineqarpoq.