Donald Trump naalakkersuinermut akisussaasumut aappassaanik eqqartuunneqalertoq

USA-p præsidentiata Donald Trumpip naalakkersuinermut akisussaasumut eqqartuunneqaqqinnissaa USA-mi innuttaasut sinnerlugit sinniisoqarfimmi, tassa Repræsentanternes Husimi amerlanerussuteqartut pingasunngornermi taasissutigaat. Nunap oqaluttuarisaanerani præsidentiunermini naalakkersuinermut akisussaasumut aatsaavissuaq aappassaanik eqqartuussisoqassaaq.

Donald Trumpip USA-mi inatsisartut ataatsimiittarfiannik kongressimik saassussisoqarnissaanut sapaatit-akunnerata siuliani kaammattuuteqarsimanini pillugu naalakkersuinermut akisussaasumut eqqartuunneqaqqinnissaa Repræsentanternes Husimi taasissutigineqarpoq.

USA-mi inatsisartut marlunnut avinnikuupput, Trumpilu eqqartuunneqarnermini pisuutinneqassanersoq inatsisartut aappaanni senatimi aalajangerneqassaaq. Trump pisuutinneqassaguni senatimi ilaasortani 100-usuni 67-init ikinnerunngitsut tapersersuisariaqassapput.

Senatimi ilaasortat maanna naligiipput, taakkunannga 50-it demokratiullutik 50-illu republikaneriullutik.

AAMMA ATUARUK Demokratit Donald Trump uppiseriaqqinniaraat

Taamaasilluni republikanerit 17-init ikinnerunngitsut præsidentiujunnaalersoq unnerluussutinut pisuutinneqassappat demokratit taaseqatigisariaqassavaat.

Ukrainep præsidentia kimigiiserfigalugu Joe Bidenip misissuiffigineqarnissaa Trumpip siornaak piumasarereeraalu, Trumpip naalakkersuinermut akisussaasumut eqqartuunneqarnissaa siorna aalajangerneqarpoq. Bidenip misissorneqarneratigut politikkikkut sulinini iluaquserneqarnissaa Trumpip neriuutigigaluarpaa.

Republikanerilli arlaannaataluunniit eqqartuunneqarnissaanut siunnersuut taamanikkut tapersinngilaat.

Trump unnerluussutinut pisuutinneqassappat præsidentiusimasut pissarsiarisartagaannik annaasaqassaaq, tassa soraarnerussutisiaqartinneqarnaviannngilaq immikkullu sungiusarneqarsimasunit Secret Servicemit paarineqarsinnaanaviarnani. Taassuma saniatigut præsidentitut sassaqqissinnaajunnaarsinneqassaaq.