Kommunimut qinersineq Qeqqata pilernguppaat
Qeqqata Kommuniani kingullermik borgmesterinngorniuttoqarmat, Sisimiuni Siumut taaguunneqarnerummat, Sisimiormioq borgmesterinngoqqippoq.
Partiimit sassartut tamarmik naligiimmik pineqassasut illoqarfimmilu taaguunneqarnerpaaq taamaasilluni borgmesterinngorumaartoq, Sisimiuni Siumumut siulittaasoq Erik Jensen oqarpoq:
- Innuttaasut taasinermikkut kina borgmesterinngussanersoq taassavaat, tassa Siumumit tamatta naligiilluta qineqqusaarluta sassarniarpugut tamattalu piukkunnassuseqarluta piareersarsimalluarlutalu.
Erik Jensenip parteeqataa Maniitsumeersoq, borgmesterip tullersortaa Gideon Lyberth, borgmesterissatut aamma sassarniarpoq.
Taassuma Maniitsup ineriartortinneqarnissaa sulissutigerusuppaa, Maniitsulli qinersisartui Sisimiunit ikinnerummata Maniitsup borgmesterinngortitsinissaa ajornakusoornerussasoq, Gideon Lyberth KNR-imut oqarpoq.
AAMMA ATUARUK Kina siulittaasunngorusuppa?
Qinersisartulli politikerillu borgmesterinngorumaartussap illoqarfimmit suminngaanneernera apeqqutaatinnagu atuuffimmut piukkunnassusaa piginnaasaalu salliutikkumaaraat, politikkikkut naliliisartoq Sten Lund neriuppoq.
- Una initunerunissaa uanga pingaartinnerussavara; kina piukkunnassuseqarpa kommunalbestyrelsemik kommunimillu kivitsisinnaasumik aammalu ataatsimoortitsisinnaasumik? Qinersisartut taama ittumik ujartuisariaqarput, Politikkikkut naliliisartoq Sten Lund oqarpoq.