Disko ulluni qulingiluani kaajallappaat

Angutit inuusuttut taakku marluk ullaap tungaagut angerlamut apuupput, sapaammi juunip 26-iani ualikkut qajarissat atorlugit Disko inuunerminni aatsaavissuaq kaajallanniarlugu aallarsimallutik.

- 400 kilometeri sinnerlugu ingerlaarfigigatsigu pikkunatallaqaaq. Sommerferiarnerput imaallaat atorluarparput, Felix Olrik oqarpoq.

Felix Olrikip nalinginnaasumik Aasianni najugaqartup angalaqatigaa Ejner Grønvold Nuummi ilinniartoq.

- Ulluni arfineq-pingasut sinneqartuni angalareerluni tikilluni nuanneqaaq. Nunaqqatit niuffiortorpassuit takullugit nuanneqaaq. Mannalumi sila alianaak, qatsunganeq seqinnarillu, Felix Olrik nuannaaqisoq oqarpoq.

Angalaqatigiit pinngortitarsuaq tupinnartoq takusassarsiorfiginiarlugu siorna aalajangersimapput, aqqutaanilumi pakatsinngeqaat.

- Qeqertarsuup kitaa avannaalu angallavigineqarpiarneq ajorpoq. Pinngortitarsuaq tupinnaqaaq, timmiarpassuit, arferit allallu uumasut takuagut, aamma qaqqarsuit tupinnaannartumik ilusillit avaqquttarpavut. Takusassarpassuit tupinnaqaat. Qujanartumik navialinngilagut, Felix Olrik naggasiivoq.

Kammalaatigiit aasap sinnera ilaqutseriffiginiarpaat. Ilimagaalli angalaqatigiinnernik kingulliunngitsoq. Angalaqqikkumaarpunngooq, kisianni sumut, sullutik qaqugulu pissanersoq oqaatigerusunngikkallarpaat.