Discoverymi filmiliortut

Ralph Grizzle, Amerikamiunit tuluttullu oqaluttunit umiarsuarnik takornariartartunit ilisimaneqarnerusoq, tuluit umiarsuarmik takornariartaataannut Discoverymut ilaalluni assiliisartullu pingasut peqatigalugit aggustimi Nunarput pillugu assiliisaassaaq. Nittarsaassinissamut atortussanik ullutsinnut naleqqunnerusunik aallakaatitassiornissaq tamatumani siunertaavoq.

- Torshavnip umiarsualivia suleqatigalugu Ralph Grizzle assiliisartuilu Savalimmiunut Kalaallillu Nunaannut aasaq manna tikeraarnissaannut qaaqquagut. Angalanertaa Discoverymit aningaasaliiffigineqarpoq uagullu nunami aaqqissuussat timmisartornissallu isumagissavagut, umiarsuarnik takornariartaatinik siunnersorti Kalaallit Nunaanni Takornariaqarnermut Inuussutissarsiornermullu Siunnersuisarfimmeersoq (GTE) Malik Milfeldt oqarpoq.

Ralph Grizzlep misigisani nittartakkami http://www.avidcruiser.com/ -imi allaaserisassavai tikiffinnillu nittarsaassinermi filmiliani naatsuni inuttaasassaaq. GTE-p pingaartissimavaa videonik immiussat umiarsuarnik takornariarnermuinnaanngitsoq atorneqarsinnaanissaat.

- Videot takisuut imaqarpianngitsullu sananeqartussaanngillat, kisiannili Kalaallit Nunaanni illoqarfiit pingasut tikeraarneqartussat pillugit paasissutissat naatsukullakkuutaat sananeqassapput.

Tamatuma saniatigut videolioriartortut aggustip 14-anni Qaqortumut pigunik Kujataani takornariartitsisartut assigiinngitsut videoliarineqassapput.

Illoqarfinni assigiingitsuni tikinneqartussani Ralph immiussisuilu naapissagaluarunikkit takornariaqarnermik sulialinnik tapersersorneqarnissartik ikiorneqarnissartillu GTE-p neriuutigaa.

Aggustip qulinganni Nuummut, aggustip 12-anni Ilulissanut kiisalu aggustip 14-anni Qaqortumut Discovery tikissaaq.