Dinosaurinik paasisassarsiorluni tunumut aasaq angalaneq Mønimi sanaartornermik pilersitsivoq
Geocenter Møn, paasisassarsiorluni angalanermik iluatsitsiffiulluartumik aaqqissuisuusoq akunnittarfimmi atorunnaarnikumi dinosaurit pillugit angisuumik saqqummersitsiniartoq, Sjællandske Medier allappoq. Plateosaurip Tunumi nanineqartup saarngi saqqummersinnissaat pilersaarutaavoq.
Allattoq Peter Troelsen, Simon Uldum
januaarip 25-at 2013 06:57
-Dinosaurimik ilivitsumik danskit naalagaaffeqatigiivisa iluanni nassaat siullersaraat. Aamma ujaranngornikunik saqqummiunneqarsinnaasut kusanarnersaat tassaavoq dinosauri. Inuit qassinilluunniit ukioqaraluarunik takorusuttarpaat, centerip pisortaa Nils Natorp Sjællandskemut oqarpoq.
Pilersaarutit malillugit dinosauri Mønimi ukiuni 5-6-ini saqqummersinneqassaaq, tamatumalu kingorna Københavnimi Uumasuusivissuup Katersugaasivianut 2017-imi naammassineqartussamut ingerlateqqinneqassaaq naggataatigullu Nunatsinnut utertinneqassalluni.
Ujaranngornikut saniatigut aamma interaktivimik takusassaqassaaq, ilaatigut plateosaurip toqunissami tungaanut uumanera misigisaqarfigineqarsinnaassalluni.
