Dinop TELE-mi pisortanngortut piumasaqaateqarfigai
Dinop oqallissaaruteqarluni suliffeqarfiup TELE Greenlandip namminersorlutik oqartussanit pigineqartup tamatuminnga allanngortitsinissaanik naalakkersuisut piumasaqarnissaat kaammattuutigaa. Assersuuteqarluni oqaatigaa assigiinnaraa niuertarfinni pisiniartut piumasaqaateqarfigineqartut tamarmik naatsiianik pisissasut, naak pisariaqartinngikkaluarlugit.
-Kisermaassilluni suliffeqarfiugaanni aatsaat taamatut iliortoqarsinnaavoq. Kisermaassisussaatitaanermik atornerluineruvoq. Atuisut aatsaat kissaatigigaangamikku oqarasuaammut nalinginnaasumut attaveqaaserneqartassapput, soorlu aamma inuit niuertarfinni pisiarerusutat kisiisa pisiarisaraat, Jørgen-Ole Nyboe Nielsen isumaqarpoq.
Tele Greenlandimi pisortaaninngortoq siunnersuummik tigussaasumik isummerfigisassaqalerpoq, maanna pisortaanerugallartup Steen Montgomery-Andersenip Michael Bintzerip aallartinnginnerani iliuuseqarfigereernianngippagu.
-Pineqartoq tusagassiuutini apriilip qaammataani qaqeqqaarpara, kingornali susassaqarfimmi tassani susoqarsimanngivippoq. Taamaammat suliffeqarfimmi kisermaassisussaatitaasumi pisortaqatigiit innuttaasunik immikkut akiliisitsisarnerup pissusissamisuunngitsup atorunnaarsitsinissaannut kaammattoqqikkusuppakka. TELE Greenlandimit nioqqutissamik kissaatigisamik pisiniarnermi immikkut akiliuteqarnissamik piumasaqaateqarnera pissusissamisuunngilluinnarpoq, Jørgen-Ole Nyboe Nielsen naqissusiivoq.
