Dieselimik uuliakoorneq aqunneqarpoq

Dieseli kussinermut Sangoriallu ilarujussuanut siammarsimavoq.

“Naak uuliakoorfiup nalaa solaarisunnissinnaagaluartoq aamma aqquserngit qalipaateqartitersinnaagaluartut, pisoq peqqissutsimut ulorianartorsiortitsinngilaq”, Kommuneqarfik Sermersuumi upalungaarsimanermut pisortaq Jes Damgaard Andersen oqarpoq.

Upalungaarsimasut kussinerni kuuffinnik matoorilertupallassimapput, dieselilu milluaammik milluarneqarpoq.

- Qatserisartut suligasuarmata imatut pinartoqanngilaq, taannartaali suli iluamik tamakkiisumik qulakkeerluanngilarput, politiini pigaartut ittuat Ole Hald ullumi oqarpoq.

Taanna nangilluni erseqqissaavoq, politiit maanna misissuleruttoraat uuliakoornermut suna patsisaasimasinnaanersoq.

- Arlaannaalluunniit piaaraluni taamaalisitsinngilaq, pisorli pivoq qanorli pisoqarsimanera maanna misissorparput, pigaartut ittuat oqarpoq.

Pisumi najuuttut suleqataasullu apersorneqassapput, Ole Hald oqarpoq, erseqqissaatigaalu suliaq maanna Nuummi politeeqarfimmut ingerlateqqinneqartoq.

Inunnilli ajoqusertoqarsimanngilaq aammalu uuliakoorneq inunnut uloriananngitsoq erseqqissaatigineqarpoq.