Diego Maradona uummammik unittoorluni toquvoq
Isikkamik arsaattartut nunarsuarmi ilisimaneqarnerit ilaat Diego Maradona uummammik unittoorluni 60-inik ukioqarluni toquvoq.
Argentinami nutaarsiassaqartitsivik El Clarin taama allaaserisaqarpoq.
Italiami Napolimi arsaattartuunini ilisimaneqaatigilluarpaa, Napoli 1987-imi 1990-imilu pissartanngortillugit.
FC Barcelonami Sevillamilu aamma arsaattartuunikuuvoq, Argentinamilu arsaattartoqatigiinni Argentinos Juniorsimi Boca Juniorsimilu aamma arsaattartuusimalluni.
Maradona mikigaluarluni nukittuujunini ilisimaneqaatigaa, nunarsuarmilu arsaattartut akornanni pikkorinnersaattut ilaatigut taaneqartarluni. Argentina 1986-imi nunarsuarmi pissartannngormat Maradona pingaaruteqarluinnartutut inissisimavoq.
Maradona 1997-imi arsaattartuujunnaarpoq, peqqissutsikkullu ilaatigut ajornartorsiuteqarluni, arlaleriarlunilu napparsimmavinnut unitsinneqartarsimalluni.
