Didda kujataani nunap sajunnera pillugu: Siniffiga sajuppoq

- Siniffiga sajulerami, nuna sajukkaangat taamaattarami, Nanortalimmiu Didda Isaksen oqarpoq.

Jannuaarip ingerlanerani pingajussaa kujataani nuna sajuppoq. Pingajussaanillu sajunnera tassa unnuaq pivoq.

Siulii jannuaarip 15-iani 19-ianilu pipput, nunallu sajunneri taakku imminnut qanittuarannguullutik, tassa Nanortalimmiit 60-70 kilometerimik ungasinnerusumiittumi sakkortunerpaaffeqarlutik.

Nunap sajunnera inoqarfiusuniit ungasiaraluartoq taamaattorli Nanortalimmi Narsamilu najugalinnit malugineqarsinnaasimavoq.

Soorluttaaq Nanortalimmiup Didda Enoksenip igalaavi kiassaataalu aalasimasut KNR.mut inuttaata oqaluttuarigai.

Nunap sajunnera sakkortunerulaartoq

Trine Dahl-Jensen Danmarkip Kalaallit Nunaatalu akornanni ujarassiornerup iluani misissuinermi ilisimatuujusoq oqaluttuarpoq, Nanortalimmiit Narsamiillu GEUS nalunaarfigineqarsimasoq kujataani nunap sajussimaneranik kalerriisunik.

Jannuaarillu ingerlanerani pingasoriarluni nunap sajunnera Richterip uuttuutaa naapertorlugu 4,5-mik annertussuseqartoq oqaatigineqarpoq.

Ukiullu 40-t kingulliit ingerlanerani kujataani sumiiffimmi tassanerpiaq 75-eriarluni richterip uuttuutaa naapertorlugu 75-eriarluni nuna sajuttareerpoq.

Nunalli sajunneri kingulliit taakku pingasut, siuliinut allanut sanilliullugit sakkortunerusimapput.

- Una pisoq Kalaallit Nunaani nunap sajunnera annertuginarsinnaagaluartoq, kisianni nunarsuaq tamaat isigigaanni nalinginnaasuuvoq. Tassami nunarsuup ilaani nuna sajullattaartuartarpoq, taanna oqarpoq.

Jannuaarimi pingasoriarluni sajuppoq

Qaammatilli ataatsip ingerlanerinnaani pingasoriarluni kujataani nunap sajussimanera ilisimatuumut uissuummiallatitsivoq.

"Eqqarsarpunga, kakkaak, ataatsikkut pingasoriarsimavoq, taava ingeriarlunga naatsorsueqqissaarinerit suliagut missortariaqarpakka piffissap sivikitsuinnaap iluani nunap sajunneri siusinnerusukkut nalaanneqarsimanersut takuniarlugu".

Taannalu naapertorlugu 2012-mi 13-milu ukiukkut aammalu 2005-mi decembarimi pingasoriarluni tallimariarlunilu nuna sajuttarsimavoq.

GEUSilu naapertorlugu, nunap sajunneri siuliisulli sakkortussusillit allat sapaatip akunnerini aggersuni aamma peqqissinnaanissaat ilimanarsinnaavoq.

Nunatta kujataani nunap sajunnerisa sakkortunersaat 1998-mi pivoq, taamanimi Richterip uuttuutaa naapertorlugu 5.0-mik sakkortussuseqarpoq, tassalu imaappoq ulluni kingullerni pisumut 4,5-imik sakkortussuseqartumut sanilliukkutsigu arfineq-marlunnik sakkornerutigisumik 1998-mi sajussimavoq.