Timersorneq

DHL Tele-Post Stafet 2015 ualeru ingerlanneqassaaq

Iligiikkuutaarluni arpannermi DHL Tele-Post-Stafet 2015-imi Nuummi Inussuvimmit aallartittussamik ualeru nalunaaqutaq tallimanut arpattoqalerpat aqqusernit inunnik ulikkaassagunarput.

Allattoq Karsten Sommer

juunip 04-at 2015 11:41

Nutserisoq Mads Lynge

Arpattussatummi nalunaarsimasut 1100-ngajaapput, siornamut naleqqiullugu 300-t missaannik amerlanerussallutik. Iligiikkuutaat katillutik 217-it nalunaarsimasut Tele-Postip nalunaarutigaa, nalinginnaasumit amerlanerullutik.

- Stafetti ukiut tallimassaat aaqqissuupparput, ullumikkullu ima ilikkarsimatigilerpugut, peqataasussat amerlassusissaat qaffanniarlugu aalajangersimalluta. Eqqugassalli annertunavianngillat, peqataasummi nuannaarlutik peqataanissaat pingaarneruvoq, suleqatigiit nuannisarnissaat pingaarnerpaalluni, arpattoqarnissaanut piareersaatinut ataqatigiissaarisoq Charlotte Mølgaard KNR-imut oqarpoq.

Nuummi Arctic Winter Gamesertoqarnissaanik pisortaq Maliina Abelsen nutaatut arpattussanik kissassartitsisuussaaq, taamaalereerpallu borgmesteri Asii Chemnitz Narup AWG-milu maskoti Kuluk arpanneq aallartissavaat.

Royal Greenland arpattut nerisassaasa karsiinut kalaaliminernik mamarunartunik ilanngussissaaq, Nuuk Imerlu arpattut imissaannik tunisisuussalluni.

Tele-Post Band arpattoqarnerup nalaani pisarnertut appisimaartassaaq, meeqqallu pississaarfigisassaannik aamma peqarumaarluni.