DHL-stafettimut peqataarusuttorpassuit
Nuummi stafettimik arpatsitsinermi DHL-imi, ukiut tamaasa Tele-Postimit aaqqissuunneqartartumi inissat, arpatitsinissamut suli qaammat ataasiusoq tamakkerneqareerput.
Holdit 220-t siorna peqataapput, tassalu peqaasinnaasut amerlassusissaannut killissaq tikillugu, arpatsitsinermik ataqatigiissaarisoq Charlotte Mølgaard Hansen taama nassuiaavoq.
Peqataasinnaasullu amerlassusissaannut killissaq holdinik marlussunnik ukioq manna qaangerneqarsimavoq, DHL-stafettimullu akornutaanngitsumik holdit amerlineqarnissaannut periarfissaqarnersoq Tele-Postip misissuleruttorpaa.
Peqataaniarlutik ukioq manna nalunaarsimasut 1.100-pput, taakkulu holdinut 220-t missaannut agguataarsimapput.
Peqataaniarluni suli nalunaarsimanngikkaanni, taava utaqqisut allattorsimaffiannut allatsittoqarsinnaavoq, misilittakkat malillugit peqataaniarunnaartoqarmat.
Stafetterneq juunip arfineq-pingajuani pissaaq, Inussivimmit aallartissalluni.
