Inatsisartuni ullormut pisussat
Pinngortitamut, Avatangiisinut Inatsisinillu atuutsitsinermut naalakkersuisup Mala Høy Kúkop aalajangiiffigisassatut siunnersuutaa siullermeerneqassaaq.
Siunnersuut meeqqat inuusuttullu sakkortuumik pinerluttuliorfigitissimasorineqartut imaluunniit takunnissimasorineqartut illersorneqarnerisa pitsanngorsarneqarnissaanik siunertaqarpoq.
Tamannalu meeqqat 12-init 15-inut ukiullit videokkut apersorneqarsinnaanerinut ukiut killigititat qaffannerisigut pissaaq, immikkullu pisoqartillugu ukiut killigitinneqartut 18-inut qaffanneqarnissaat periarfissaassalluni.
Tamanna pereerpat, aktiaateqarluni piginneqataassuteqarlunilu ingerlatseqatigiiffiit pillugit inatsisip - ingerlatseqatigiiffiit pillugit inatsisip - atuutilernissaa pillugu Kalaallit Nunaannut peqqussummut oqaaseqaatissamut Inatsisartut aalajangiiffigisassaattut Naalakkersuisut siunnersuutaat oqaluuserineqassaaq.
Siumumeersup Suka K. Frederiksenip Inatsisartut aalajangiiffigisassaattut siunnersuutaa tulliullugu oqaluuserineqassaaq. Taannalu Namminersorlutik Oqartussat tamakkiisumik piginnittuullutik aktiaateqarluni ingerlatseqatigiiffiini ataasiakkaani siulersuisunut ilaasortassanik toqqaasarnermi nunatsinni najugaqavissut amerlanerussuteqartut ilaasortaasalernissaannik Naalakkersuisut aalajangersagaliorlutik inatsisissamik Inatsisartut aappaagu upernaakkut ataatsimiinnissaannut saqqummiussassamik siunnersuusioqqullugit peqquneqarnissaannik siunnersuutaavoq.
Kingullertullu, Demokraatineersup Justus Hansenip aalajangiiffigisassatut siunnersuutaa oqaluuserineqassaaq. Tatumanilu pineqarpoq Danmarkimi politini pisartutut Kalaallit Nunaanni politiit nalunaaruteqartoqarneraniit qisuariarnissap tungaanut piffissamik atorneqartartumik nalunaarsuisalernissaat pillugu Naalakkersuisut danskit inatsisinik atortitsinermut ministerianut attaveqaqqullugit peqquneqarnissaannik Inatsisartut aalajangiiffigisassaattut siunnersuut.
