Præsidentip Illorsua: Trump coronaviruseqanngitsoq misissortinnerisa takutippaat
USA-p præsidentia Donald Trump ulluni arlaqalersuni coronaviruseqanngitsoq misissortinnerisa takutippaat.
Donald Trumpip præsidentip illorsuani Det Hvide Husimi nakorsaa, Sean Conley, Donald Trump coronavirusimik tunillatsissimasoq sapaatit akunnerata siuliani tallimanngornermi nalunaarutigineqareersorlu, ataasinngornermi taama nalunaarpoq.
Trump tunillaasinnaanngitsoq, Conley aamma oqarpoq.
Trumpip coronaviruseqarunnaarneranik nalunaarut, præsidentip oqaaseqartartuata Kayleigh McEnanyp, inoqatinut attaveqaatikkut Twitterikut, Donald Trumpip Floridami qinersisartunik ataatsimiititsinissaa sioqqutilaarlugu, saqqummiuppaa.
AAMMA ATUARUK Nakorsap Trump aaqqissuussanut ammasunut peqataasinnaanngorneraraa
Præsidenti coronavirusimik tunillatsissimasoq ullut qulit matuma siorna nalunaarutigineqaramili qinersisartunik marlunngornermi siullermeerluni ataatsimiititsivoq.
- Floridami ullut 22-t qaangiuppata ajugaassaagut, ukiunilu sisamani siuttooqqinnissatsinnut ajugaassaagut, Trump oqarpoq.
Præsidentip coronavirusimik nappaateqarnini qaangerluarsimaqigini, tapersersortiminut oqaatigaa.
- Tunillanneqarsinnaajunnaartunga oqaatigaat - nukissaqarluaqisutullu misigaanga. Inuit najuuttut tamarmik kunissavakka, præsidenti oqarpoq.
Trump ilaatigut Pennsylvaniami, Iowami North Carolinamilu tapersersortiminik pilersaarutit malillugit sapaatit akunneranni uani ataatsimiititsissaaq.