Nakorsap Trump aaqqissuussanut ammasunut peqataasinnaanngorneraraa

USA-p præsidentiata Donald Trumpip Covid-19-imut katsorsarneqarnini anigorluarpaa, aaqqissuussanullu ammasunut tamanut arfininngornermit peqataasinnaanngussalluni.

Trumpip nakorsaa, Sean Conley, Det hvide Hus sinnerlugu taama nalunaaruteqarpoq.

- Angerlaramili misissorneqarnerata takutippaa aalaakkaasoq, nappaatillu ajornerulersinnaaneranut takussutissaqanngilaq, Sean Conley sisamanngornermi taama nalunaaruteqarpoq.

AAMMA ATUARUK Trumpip coronavirusimik tunillanneqarnini Guutimit pilluaqqussutitut taagaa

Floridami qinersisartunut arfininngorpat ataatsimiititsissagunarnini, Trumpip Fox Newsimit apersorneqarluni oqaatigaa, peqqillunilu ajunnginnini tassani aamma oqaatigalugu.

Trumpip coronavirusimik tunillanneqarsimanera pissutaalluni præsidentimut qineqqusaartut oktobarip ulluisa 15-ianni oqallitsinneqarnissaat attaveqaatit atorlugit ingerlanneqassasoq, præsidentimut qineqqusaartut oqallitsinneqartarnerannut ataatsimiititaliap nalunaarutigaa.

Attaveqaatilli aqqutigalugit oqallitsitsisoqarnissamut peqataaniannginnini, Trumpip kingorna oqaatigaa.

- Tunillaassuisinnaanngitsutut imminut isigivunga, Trump Fox Businessimut oqarpoq. Nutaarsiassaqartitsivik DPA taama allappoq.