Ukioq nutaaq ICC-mut ulapaarfiussaaq
Kitigaaryuinit Nalunaarutip Akilinermi Inuuvimmi siorna ataatsimeersuarnermi akuersissutigineqarneratigut tamanna pisussanngorpoq.
- Tamanna ICC Kalaallit Nunaannut imaannaanngitsunik unammilligassanik pisussaaffiliivoq, soorlu Inatsisartut, Naalakkersuisut aamma Danmarkimi nunanut allanut ministereqarfik allallu suliffeqarfiit kattuffiillu qanimut peqatigalugit suliarisariaqakkatsinnik, Hjalmar Dahl oqarpoq.
Taassuma aamma erseqqissarpaa, ICC-p siulersuisuuneri qinigaaffimminni ukiuni sisamaasuni, aningaasarsiorneq pillugu Inuit Issittormiut Ataatsimeersuarnissaannik pilersaarusioqqullugit ingerlatseqqullugillu ilaatigut pisussaaffilerneqarmata. Ataatsimeersuarnermi tassani naggueqatigiit Inuit suliffeqarfiutaasa suleqatigiissinnaanerat misissorneqassasoq aamma akunnerminni misilittakkaminnik paarlaateqatigiissinnaanerat aqqutissiorniarneqarluni.
ICC-p qullersaqarfia Issittumi uumasunik iluaquteqarniarnermi aqutsineq pillugu naggueqatigiit Inuit ataatsimeersuartinneqarnissaannik pilersaarusioqqullugu ingerlatseqqullugulu aamma pisussaaffilerneqarpoq.
ICC-p Nunatsinni, Canadami, Alaskami Tjukotkamilu immikkoortortaqarfiisa suliassatik pillugit maanna aaqqissuussereerput, ukiunilu tulliuttuni sisamani suliassatik piareersareerlugit. Siunnersuisoqatigiiffiup siulersuisuuneri januaarip qiteqqunnerani Nuummi ataatsimiissapput, tassanilu Kitigaaryuinit Nalunaarummi suliassiissutit aallaavigalugit suliassat agguataarneqarnissaat aamma oqaluuserineqassallutik.
- Sooorunami suliat ingerlaavartut, soorlu toqqaannartumik ataavartumillu Issittumi Siunnersuisoqatigiinni taassumalu suleqatigiiffiini ataqqineqartumik suleqataanitsinnut sunniuteqarnerput ingerlaannassaaq, Hjalmar Dahl ukiortaami oqaaseqaammini erseqqissaavoq.