Kapisilinni sukkasuumik internetersinnaalerput
-Illup iluani attaviluppallaaleraangat igalaap saavaniittariaqalertarama massakkut qilanaarnaqaaq eqqissilluni internettersinnaalernissaq, Kapisilimmiu Vittus Lukassen oqarpoq.
Attaveqaat nutaaq oqarasuaatikkut oqaluussinermi minnerunngitsumillu internettikkut attavigissaartitsinerussaaq. Kapisilinniittullu nunatsinni siullerpaallutik internettimut attavik sukkanerusoq misilerassavaat.
Tele Postip pisortaanerata Kristian Reinert Davidsenip attavik atuarfimmi nunaqarfimmi innuttaasut amerlanerpaartaasa orniguffigisaanni saqqummiuppaa, tassanilu kaffeqarlunilu kaageqarpoq 4G-mullu attaveqaatinut modeminik agguaassisoqarluni.
Meeqqat ilaat karseeqqanut modeminik imalinnut nerriviup qaavaniittunut alapernaallutik arpaqattaarput, isersimasullu ilaat skærmimut youtubep qanoq sukkatigisumik ujaasineranut malinnaallutik isiginnaarput.
Tele Postip siulersuisuini siulittaasup Stine Bossep korea kujallermit nipilersuutip videoa soqutigineqarmat illaatigaa.
AAMMA ATUARUK Immap naqqatigut kabelip suliarineqarnerata internetti arriinnerulersissinnaagaa
Taassuma internettip sukkanerunissaanut peqqutigineqarluartut netflix facebookilu soqutigivallaanngilai.
- Maanna atuarfimmiippugut, attavillu atuarfimmut ajunngitsumik sunniuteqarluassasoq, tassa atortorissaarutinik pissarsiniarnermut ajornaannerusumillu filminik aallakaatitsissutaasinnaassasoq aammalu nunarsuarmiunut allanut qaninnerutilersitsinissaa neriuutigaara.
Tamannalu Vittus Lukassenimut pingaaruteqarpoq.
- Misilittarnissaa pissanganaqaaq. Tassuunartatigut ilaquttat ungasinnerit isigiitigalugit oqaluuttalernissaat. Taanna assut qilanaartnartotrtarivaa.
Vitus Lukassen oqarpoq.
4G-mut attaviit silaannakkoortut nutaat atorlugit innuttaasut 92 procentii sukkanerusumik internettimut ukiup tulliata ingerlanerani attaveqalissapput. Nunatta avannaani tunumilu qaammataasamut suli attaveqarfiusuni internetti allamisulli sukkatiginavianngilaq, 4G-mulli attaveqartoqarsinnaassaaq piffissallu ingerlanerani sukkassuseq qaammataasat sukkatsisitsiartorneranni pitsaaneruleriartusaaq.
