Dennissip ikinngunni ipilersoq annaakkaa

Dennis Poulsen 13-nik ukiulik, kiisalu Inutsiaq Olsen qulinik ukiulik aasaq junip qaammataagaa marluullutik tatsimi ”Qooroorsuarmi” Nasiffiup eqqaani Ilulissaniittumi umiaasaaqqamik namminneq sanaaminnik umiaasarujoortillutik ajorluinnartumik misigisaqangajapput.

Inutsiaq Olsen qulinik ukiulik umiaasarnermi nalaanni kingulluni tatsimut isippoq, taserlu itimmat nalussinnaananilu,  tatsimi nuisaqattaarlunilu morsuttaqattaalerpoq. Taamaasimmat ikinngutaa 13-nik ukiulik Dennis Poulsen qujanartumik iliuuseqapallappoq.

Dennis nalussinnaagallartilluni tatsimut tingivoq, ikinngutinilu annaallugu tatsip sinaavanut apuullugu.

Ullumi ullaap tungaa nalunaaqutaq qulinut, Dennis Poulsen pisimasumi tassani sapiitsuliorsimasutut, politiassisitimit Abia Ottosenimit Ilulissat politiianneersumit tunniunneqartumik 2.000 koruuninit nalilimmik nersornaasigaavoq.