Louisiana ukiut kingulliit 100-t ingerlaneranni aatsaat taama sakkortutigisumik anorersuartoq

Ulussaarsuaq Laura USA-p kimmut kujasissortaanut sisamanngornerup unnuaani anngupppoq, naalagaaffik Louisiana eqqorlugu.

Louisiana ukiut kingulliit 100-t ingerlaneranni anorersuarujussuarmik aatsaat taama sakkortutigisumik nalaanneqartoq, nutaarsiassaqartitsivik CNN allappoq.

Ulussaarsuaq Katrina 2005-imi aseruatiteringaatsiarpoq, Laurali ulorianarnerusinnaasutut silasiortunit mianersoqqussutigineqarpoq. Inuit 1800-t Katrina 2005-imi pitorallarmat ajunaarput, 800 milliardit dollarit missaasa nalinginut aseruatiterilluni.

AAMMA ATUARUK Harvey USA-mi pinngortitami ajunaarnersuarni akisunerpaanngorsinnaasoq

Illoqarfissuaq New Orleans taamani eqqugaanerpaavoq.

- Ulussaarsuaq ulorianartorujussuaq Louisianami illoqarfiup Cameronip eqqaanut sisamanngornerup unnuaani annguppoq, USA-p anorersuarnik nalunaarsuiffia NHC allappoq.

- Malliorujussuarnerit, anoraasuarujussuarnerit qarsutsinerujussuillu Louisianap ilaanik eqquissapput, NHC ilisimatitsivoq.

Texasimi illoqarfimmit Port Arthurimit kangimut 70 kilometeritut ungasitsigisumi anoraasuarnerit akunnermut 240 kilometeritut sakkortutigisut uuttortarneqarsimapput. USA-mi uuliamik akuiaaffiit annersaat Port Arthurimi inissisimavoq.

Mallit 6 meterisut angitigisinnaanerat aarlerisaarutigineqartoq, nutaarsiassaqartitsivik DPA allappoq.