Demokraatit Siumut Qoornumi isumaqatigiissummut atsioqquaat

Demokraatit siulittaasuata Jens B. Frederiksenip Siumut maanna kajumissaarpaa, Qoornumi aasaq isumaqatigiissut atsioqqullugu.

Isumaqatigiissut Atassummit aamma atsiorneqareerpoq, Demokraatillu siulittaasuata maanna erseqqissarpaa isumaqatigiissut suli atuummat, naak aningaasaqarnermut naalakkersuisup Palle Christiansenip sapaatip-akunnera kingulleq oqaasii Siumumit allatut paasineqaraluartut. Tassa qinngornernik navianartunik uranimik akulinnik piiaasoqanngilluinnarnissamik aalajangiussisimaneq aalajangiusimaneqarmat.

- Demokraatini siulittaasutut matumuuna erseqqissaatigissavara Qoornumi isumaqatigiissut Demokraatit tamakkiissumik tapersersormassuk, taamaattumillu Siumup taamatullu tusagassiuutit Naalakkersuisoqatigiit iluminni isumaqatigiikkunnaarnerarlugit eqqarsaatersornermik piffissaajaateqarnissaat tunngavissaqarani, Jens B. Frederiksen erseqqissaavoq.

Qoornumi isumaqatigiissut tunngavigalugu qinngornernik navianartunik uranimik akulinnik piiaasoqanngilluinnarnissamik aalajangiussisimaneq aalajangiusimaneqarmat. Isumaqatigiissummi aamma takuneqarsinnaavoq aatsitassarsiornermut inatsit piffissap qinigaaffiusup atuuttup matuma iluani nutaamik naliliiffigeqqinneqarumaartoq, tamatumunngalu atatillugu qinngornernik navianartunik akulinnik piiaasoqanngilluinnarnissaanik aalajangiinerup atorunnaarsinneqarnerata kingunerisaanik avatangiisitigut peqqinnissakkullu kingunerisinnaasai erseqqissaavigineqassapput.

Isumaqatigiissut Inuit Ataqatigiinnit, Kattusseqatigiit Partiiannit, Demokraatinit Atassummilu ulloq manna tikillugu atsiorneqarpoq. Demokraatillu siulittaasuata Siumut atsioqqullugu maanna tassa kaammattorpaa.

- Taamaaliornikkut uranimik piiaanngilluinnarnissamik aalajangernerup atorunnaarsinneqarnissaa qulakkeersinnaavarput, tamanna peqqissutsimut avatangiisinullu illersorneqarsinnaasumik pissappat, Jens B. Frederiksenip Siumumut kaammattuutini taama naggaserpaa.