Demokraatit: Sakkut pillugit inatsit sukaterneqarli
Inuussutissarsiutigalugu piniarnermut atugassanik sakkutaarsinnaanissamut 16-inik ukioqalereersimanissaq, Justus Hansip ilaatigut piumasaraa.
Piniartup Niaqornarmiup Karl Kristian Krusep siunnersuummi anguniagaasut tunngaviusumik isumaqatigai, 16-inilli ukioqalersimanissaq illuatungilerlugu:
- Meeraqarsimagutta perorsaanitsinni aallaasit sakkullu qanoq atornissaannik ilinniartilereertarpavut. Meeraaneranni angalaqataasarlutik. Seqqortaaqatigisarpakka, kisianni ukiunik killiliilluni 16-inik inissiisoqassappat, isumaqarpunga piniartukkunnik perorsaariaatsimillu kinguariartitsissasoq, Karl Kristian Kruse oqarpoq.
Aallaasit qanoq inissinneqartarnissaannut malittarisassaliuunneqarnissaat Demokraatit aamma siunnersuutigaat.
Aallaasit parnaarsaataallu immikkoortillugit inissisimatinneqartarnissaat piumasaqaataasiariaqartoq aamma siunnersuutigineqarpoq, aallaat tillinneqassagaluarpat taamaaliornikkut atorneqarsinnaanissaa pinngitsoorniarlugu.
Karl Kristian Krusep tamanna paasilluarpaa:
- Isumannaatsuutitsinissamut inissisimatitsinerup aaqqissuunneqarnissaanut isumaqarpunga tamatta peqataanissatsinnut nukissaqarlutalu peqataasinnaasugut, Karl Kristian Kruse oqarpoq.
Nunatsinni sakkut pillugit inatsit maanna atuuttoq 1992-iminngaanneersuuvoq, tassungalu atatillugu nalunaarutit katillugit sisamat atulersinneqarnikuullutik.