Demokraatit: Neqinut akitsuutit peerneqarlik
Demokraatit siulittaasuat, Jens-Frederik Nielsen siunnersuuteqarpoq neqinut akitsuutit peerneqassasut.
Jens-Frederik Nielsen (D) isumalluarpoq neqit akitsuutaasa peerneqarnissaannik siunnersuutini Inatsisartunit suliarineqaruni ilalerneqarumaartoq:
- Demokraatinit sulissutigiuassavaarput innuttaasut namminneerlutik aningaasaatiminnik annerpaamik aqutsinissaminnut periarfissaqartinneqassasut, siunnersuullu annikitsuaqqatut nalilerniarneqarsinnaassagaluartoq, taamaattoq akitsuutinik annikillisaaneq piiaanerlu innuttaasut aningaasaatiminnik namminneq aqutsinissaminnut periarfissaqarnerulersinneqarnissaannut aqqutissat ilagilluinnarpaat.
- Aamma eqqaamaneqartariaqarpoq partiit tamarmik qineqqusaarnerni (2021-mi upernaakkut, aaqq.) innuttaasunut neriorsuuteqartuarput ulluinnarni inuuniarneq akikinnerulissasoq, taamaattorli Naalakkersuisut aappaagumut aningaasanut inatsisissatut siunnersuutaat qimerlooraanni, ukioq manna aningaasanut inatsimmik nangitsiniarnerinnaasoq takuneqarsinnaavoq.
- Uffa illuatungaani nunatsinni innuttaasut aammalumi inuussutissarsiuteqartut nunarsuaq tamakkerlugu aningaasat naleerukkiartornerat aallaavigalugu iliuuseqartoqarnissaanik ujartuinerat annertoorujussuugaluartoq, siunnersuuteqartoq Jens-Frederik Nielsen (D) KNR-imut nassuiaavoq.
AAMMA ATUARUK Partiit sisamat aningaasanut inatsit pillugu isumaqatigiittut
Jens-Frederik Nielsen (D) assersuutinik marlunnik saqqummiussivoq neqit neqinillu nioqqutissiat akitsutaasa peerneqarnerat nunatsinni ilaqutariinnut qanoq isumaqassanersoq:
- Tamanna assersuutigalugu kinguneqassaaq nersutip neqaa aserortigaq ullumikkormit 10 kr.-mik akikinnerulernissaa, savaaqqallu quttoraa 2 kilo eqqunneqarsimasup 50 kr.-mik ullumikkormit akikinnerulernissaa. Assersuutaannaapput kisiannili aamma qallersuutissat tinguaqqallu aamma akikinnerulissapput, siunnersuuteqartoq siunnersuummini tunngavilersuivoq.
Kaffit, tiit timmissallu akitsuutaat peerneqarnikuupput
Partiit sisamat, tassalu Inuit Ataqatigiit, Demokraatit, Naleraq aamma Atassut ukioq mannamut aningaasanut inatsit pillugu isumaqatigiissuteqarnikuupput, isumaqatigiissutaasullu ilagaat kaffit, tiit timmissallu nunatsinnut nioqqutissatut eqqussukkat akitsuutaat peerneqassasut. Peerneqareeraluartulli nioqqutissat taakkorpiaat allat assigalugit akitsoraluttuinnartut ilisimaneqarpoq:
- Aap, ilumoorpoq ajoraluartumik aningaasat amerlanerusut inuit ataasiakkat aningaasiviinut tunngillat, tamannali nunarsuarmi covid-19-ip tuniluunneranik aammalu minnerunngitsumik Ukraine-mi sorsunnermik pissuteqarpoq. Taakku akitsuutaat peersimanngitsuugutsigu, takorlooruminaappoq nioqqutissat taakku ullumikkut qanoq akeqarsimassagaluarnersut.
- Taamaammat toqqaannartumilluunniit akitsuutit peerneqarsimanerat malugisinnaanngikkaluarutsigu oqilisaaneq innuttaasunut toqqaannanngikkaluartumik atuuppoq innuttaasunullu iluaqutissiilluni, isumaqarpugullu neqit neqinillu nioqqutissiat akitsuutaasa peerneqarnerat innuttaasut ataasiakkaat aningaasaqarnerannut iluaqutissiissasoq, pingaartumik isertitakinnerusut akunnattumillu isertitallit malugisinnaasaat, Jens-Frederik Nielsen (D) erseqqissaavoq.
Neqinut neqinillu nioqqutissianut akitsuutaat ullumikkut atuuttut imaapput:
- Savat savaaqqallu neqaat taakkunanngalu nioqqutissat Kg.-mut 25,00 kr.
- Nersussuit neqaat, taakkunanngalu nioqqutissat, nutaat nillataartitalluunniit Kg.-mut 10,00 kr.
- Nersussuit neqaat, taakkunanngalu nioqqutissat, qerititat Kg.-mut 6,75 kr.
- Puulukit neqaat taakunanngalu nioqqutissiat, nutaat, nillataartitat qerititalluunniit Kg.-mut 2,25 kr.
- Puulukit neqaat taakkunanngalu nioqqutissiat, tarajortikkat, taratsumi aatsitaniittut, panertitat imaluunniit pujuukkat Kg.-mut 3,25 kr.
- Savat savaaqqallu neqaannik nioqqutissiat, piariikkat imaluunniit aqerlortikkat Kg.-mut 25,00 kr.
- Nersussuit neqannik nioqqqutissiat, piariikkat imaluunniit aqerlortikkat Kg.-mut 4,00 kr.
- Puulukit neqaannit nioqqutissat, piariikkat imaluunniit aqerlortikkat Kg.-mut 2,00 kr.
- Pølsit suulluunniit Kg.-mut 3,00 kr.
- Tingummit nioqqutissiat, piariikkat imalunniit aqerlortikkat Kg.-mut 2,50 kr.
Naalakkersuisut aamma takunnissinnaasimagunarput kaffit tiit timmissallu nioqqutissatut eqqussuussat akitsuutaasa peerneqarsimanerat akit qaffakkaluttuinnarnerisa nalaani maanna nalaatatsinni iluaqutaasimasut, taamaammallu toqqarsimavaat siunnersuuteqassallutik nioqqutissat taakku akitsuutaasa peerneqarallarsimanerat qaqugorsuarmut atuuttunngortinneqassasoq taamaammallu akitsuutit pillugit inatsit allanngortinneqassasoq.
Akitsuutit atorunnaarsinnerisigut nunatta karsiata isertitaasa ikinnerulissutaat, Demokraatit isumaat naapertorlugu Ilanngaassiviup atuutilerseqqinneqarneratigut pissarsiarineqassappit.
- Ilanngaassivik pisariaqarpoq. Ilanngaassivik tassaavoq inuit akiliisinnaagaluarlutik akiliinerli ajortut akiliisalernissaannik isumannaarinniffiusussaq. Taanna eqqunneqarsinnaasuuppat, 30 milliuunit koruunit nunatta karsianut ukiumut isertinneqartassagaluarput, Jens-Frederik Nielsen (D) oqarpoq.
Aningaasalersuinissamulli siunnersuut piviusunngorsinnaanersoq apeqqutaavoq, tassami Ilanngaassiviup atorunnaarsinneqarnissaanik siunnersuut Inatsisartut upernaaq manna ataatsimiikkamik amerlanerussuteqarluartut akuersissutiginikuummassuk, Demokraatillu kisimiillutik akerliullutik.
