Demokraatit: Kuannersuarni aatsitassarsiornissaq maanna pisariaqalerpoq.

Kuannersuarni aatsitassanik piiaaniarnermi paasiniagassat, uani qinigaaffimmi naammassineqarnissaat isumaqatigiissutigiissutigineqarpoq.

Naalakkersuisut siulittaasuata ammaanersiorluni oqaaseqaataata Inatsisartuni partiinit oqallisigineqarnera iluatsillugu, Demokraatit politikkikkut oqaaseqartartuata, Niels Thomsenip paaserusuppa suliap sumut killinnera:

- Pingaartipparput maanna susoqartariaqartoq. Ilisimasallit qanoq oqariartuuteqarneri uani pingaaruteqarput. Atorsinnaanngilarput politikkikkut misigissutsit aallaavigalugit isummersorneq. Aallaavigissavarput ilisimasanik tunngavilersorneq, aatsaallu taamaaliornikkut uangut politikerit isummersulissalluta ilumut aatsitassanik piiaasinnaalernissarput piviusunngortissallugu. Tassa tamanna atorfissaqartitarput, Niels Thomsen taama oqarpoq.

Aatsitassarsiorneq eqqarsaatigalugu Demokraatit Inuit Ataqatigiinnit allaanermik politikkeqarput, ilaatigut uranitalinnik piiaaniarnermi oqallinnermi suleqatiminnit allaanerusumik isummertarlutik. Niels Thomsenip erseqqissarpaa Naalakkersuisooqatigiinnermi suleqatigiinneq allanngortinniarneqanngimmat, nangillunilu ima oqarluni:

- Isumaqatigiissupput tamakkiisumik ataqqivarput, ataqqinninnerpullu uaniippoq, tassa isumaqatigiinnikuugatta qinigaaffimmi uani aatsitassanut inatsit qulaajaaffigineqassasoq naammassineqarlunilu, tassalu tamassuma naammassineqarnissaa uangut neriuutigalutigu, Niels Thomsen oqarpoq.

Siumup siulittaasuata, Aleqa Hammondip oqaatigaa, Inuit Ataqatigiit aatsitassassarsiornermut politikkiat pisuulluni, Nunatta aningaasatigut ineriartornissaa uninngatinneqartoq, naak Naalakkersuinikkut suleqataasut Demokraatit, aatsitassarsiorneq piaarnerpaamik aallartikkusukkaluaraat:

- Demokraatit aatsitassanik piiaasinnaaneq piaartumik perusukkaluaraat, suleqataasa Inuit Ataqatigiit tunuartitaarutigaat, tassa uranitalinnik piiaarusunnginnermik tunngaveqarlutik, tassalu taamaalilluni Nunatta aningaasarsiorsinnaanissaa killilersorlugu, Aleqa Hammond oqarpoq.

Naalakkersuisut siulittaasuata, Kuupik Kleistip maluguniarsimavaa Inatsisartuni oqallinnerni, aatsitassanik uranitalinnik piiaarusussuseq angorusunneqartoq, Kuupik Kleisti tamanna pillugu ima oqarpoq.

- Kisianni Inatsisartuni tunngaviusumik isumaqatigiissutigaarput, avatangiisinut inunnullu ulorianaataasinnaasut aatsaat qulaajarneqareerpata aatsitassarsiortoqarsinnaasoq. Taamatullu aalajangernissamut tunngavissagut suli ullumikkut amigarpallaarput. Siusinnerusukkut siunnersuutaasarsimasut ilaat piviusunngussagaluarpata, taava aatsitassarsiornermi suliassat ilaat taamaatiinnartariaqalissagaluarpavut. Taamaattumik tuaviorpallaarneq akornutaasinnaavoq iluamik pisumik aatsitassarsiorsinnaanissatsinnut, taamaattumik tutsuiginartunik tunngavissaqarluarnissarput uagut pingaartinnerpaavarput, Naalakkersuisut siulittaasuat Kuupik Kleist oqarpoq.