Demokraatit KNR pillugu oqallinnermut ilanngupput
Atassutip politikkikkut siulittaasuata tulliata Steen Lyngep "kiffartuussinermut isumaqatigiissut aqqutigalugu KNR-ip kulturikkut akisussaaffiata naammassineqarnissaa" naalakkersuinermik suliallinnut siusinnerusukkut kajumissaarutigaa.
Tusagassiorneq pillugu Demokratit oqaaseqartartuat Andreas Uldum tamatuma kingorna allagaqarpoq. Atassutip kajumissaarutaa tamat oqartussaaqataanerannut saassussinerunerarpaa:
- Aaqqissuisoqarfiit imassatigut pingaarnersiuineranni politikerit akuliunnissaat ataasiaannarlutaluunniit akuerigaluarutsigu taava peqataanik akuerissavarput tusagassaqartitsiviit kiffaanngissuseerutsitaanerat, Uldum allappoq.
KNR-illi ulluinnarni ingerlanneqarneranut naalakkersuinikkut akuleruttoqarnissaa kissaatiginnginnamiuk Steen Lyngep KNR-imut maanna erseqqissaatigaa. KNR-ip internettimi pisussaaffiinik kiffartuussinermik isumaqatigiissummi erseqqissaasoqarnissaa kissaatigaa.
- Ilisimatuut oqallinnerisa saniatigut tamat peqataasinnaanissaat periarfissinneqarmat oqaaseqaateqartarneq pitsaasuuvoq. KNR-ip tamanna matummagu iluatsitsineruallaanngilaq, Steen Lynge oqarpoq.
Tamatumanilu Steen Lyne Demokratinit isumaqatigineqarpoq.
- Aalajangerneq tamanna Demokraatit uggornartutut isigaat, KNR-ip nittartagaani uparuaassutit oqallinnermut, inuunermut kiisalu sunniisinnaanermut uummarisaataasarmata, Andreas Uldum allappoq.
