Demokraatit: Akiligassallit akiliisaraluarunik akitsuutit nutaat pisariaqassanngikkaluarput
Demokraatit siulittaasorigallagaata, Nivi Olsenip innuttaasut tupat, mamakujuit, imigassallu akitsuuserneqarnerulerneri illorrisimaarutiginngikkaat facebookikkut malugisimavaa. Taamaammat Nivi Olsenip akitsuutit demokraatinit sooq akuersiffigeqataanersut videoliakkut nassuiaateqarfigigaa Demokraatit saqqummersippaat.
Nivi Olsen videomi ilaatigut oqarpoq:
- Inuiaqatigiittut qiviagassarput aajuna, sooruna tassunga killissimasugut? Siullertut, inuiaqatigiit akiligassaqarput, inuiaqatigiittut akiliisarsimannginnatta, akiligassaq 1 milliardimut qaqisimavoq. Akiliisarsimagaluarutta tassunga killisimassanngikkaluarpugut, Nivi Olsen oqarpoq.
AAMMA ATUARUK Vores gæld runder snart en milliard kroner
Pisortanut akiligassagut qaffakkiartorput, akilersuutillu akilerneqartanngitsut annerit ilagaat. Tassani akiligassat 400 millionit koruuniupput, agguaqatigiissillugulu innuttaasoq ataaseq pisortanut 18.000 koruunit missaannik akiligassaqarpoq.
10.000-t sinnerlugit videomik takunnittut
Nivi Olsenip isornartorsiuinermut annikilliiniarnera facebookimi atuisinit tigulluarneqanngilaq. Videomut oqaaseqarnerit misissorluaraanni demokraatit aningaasanut inatsisimut ikuallattumut benziinamik kuisisimasutut isikkoqarput.
Video marlunngornermi ualikkut 184-erluni oqaaseqarfigineqarsimasut videoliarlu 309-riarlugu siammarterneqarsimalluni.
Demokraatit qineqqusaarnermi akileraarutinik akitsuutinillu annikilliiniarlutik qineqqusaarsimanerarlugit oqaaseqartut qassiiusut allataanni atuarneqarsinnaavoq.
AAMMA ATUARUK Brugsenimi niuerniat akitsuutit nutaat pillugit: Silatusaarneq - sianilliorujussuarnerluunniit
Demokraatit akitsuutinik nutaanik illersuinerminni sulinermut ilanngaatit ilaatigut atuutsinneqalilersut illersuutigaat.
- Sulinermut ilanngaatit atuutsilerneqarnerat, isertitakitsut akunnattumillu isertitaqartut aningaasat atorsinnaasaat qaammammut 350 koruunimik qaffassammata eqqaamassallugu pingaaruteqarpoq. Taamaammat mamakujuit, imigassat, cigarrettillu akitsorarluartut aningaasassaqartoqarnerulissaaq, Demokraatit oqaaseqartut ilaannut allallutik akissuteqarput.
Qularunnaarsinneqarsinnaanngitsut
Demokraatit Facebookimi atuisartut ilorrisimaanngitsut qularunnaarsinniarnerat nalinginnaasumik ajornakusoortippaat.
- Innuttaasununaasit aallerlusi. Soormi massakkuinnaq ataasiaannaq ilissili kaassarfissinniik aallerussi, akissarsiarsuasi annertutingisut ilanngaanneqalaarlusi, paasissangaluarparsi qanoq misinnarnera. Tassaqaluunnit malungissaluarpisiuk akissaateqangaarassi, Gunna-Vera Berthelsen Demokaatit Facebookimi qupperneranni allappoq.