Demokraatini nuimanerit marluk tunuarnerat ernumanartortaqanngitsoq
Niels Thomsen Inatsisartunut 2018-imi qinersinermi 2773-inik qinersisoqarpoq.
Nivi Olsen 874-init taaneqarpoq.
Randi Vestergaard 579-init taaneqarpoq.
Tunngavik: qinersineq.gl
Thomsen Randilu demokraatini pingaarutilinni inissisimajunnarnerat ajornartorsiortitsinngitsut Demokraatini siulittaasuugallartoq Nivi Olsen oqarpoq.
Demokraatini nuimanerit marluk, Niels Thomsen inatsisartuni sulinngiffeqarnini sivitsorpaa, siulittaasuugallartorlu Randi Vestergaard Evaldsen Kalaallit Nunaanni Brugsenimi pisiortornermi pisortanngorluni. Tamanna partiimi siulittaasup tulliata Nivi Olsenp ernumanartoqartinngilaa.
Niels Thomsen siulittaasutut sulinngiffeqarnini sivitsorpaa uippakajaarnini pissutigalugu, Randi Vestergaard Evaldsenilu Inatsisartuni aamma Kommuneqarfik Sermersuumi kommunalbestyrelsemut ilaasortaanerminit tunuarluni. Nivi Olsen partiimi siulittaasuugallartutut inissippoq.
Taannali isumaqanngilaq partiimi ajornartorsiortoqartoq.
- Randi Vestergaard Evaldsen ukiut tallimat politikikkut sulereerluni, aqqutinik nutaanik Randimut tulluarluinnartumik toqqaavoq, tamanna ajornartorsiornertut taaniarneqaraluartoq, uanga taamatut isiginngilara, uggornarput inuit taama pikkoritsigisut atorfissaqartitagut, taamatut Randip politikiminngaanit aninera uggornartorujuuvoq, Nivi Olsen taama oqarpoq
AAMMA ATUARUK Politikkimit tunuartoq: Randi Vestergaard Brugsenimi pisiortornermi pisortaassasoq
Randi Vestergaard Evaldsen Inatsisartunut qinigaavoq.
Taassuma inatsisartuni inaa Simigaq Heilmannimit nanginneqassaaq, sinissiisussatut inissisimagami. Simigaq Heilmann inatsisartut ukiakkut ataatsimiinnissaanni ataatsimeeqataassaaq.
Kalaallit Nunaanni Brugsenimi pisiortornermi pisortanngorlaaq, Kommuneqarfik Sermersuumi kommunalbestyrelsemut qinigaavoq, tassani siulittaasup tulliatut inissisimalluni.
Nadia Olsen sinniisussatut siullertut ilaasortanngussaaq.
Nivi Olsenip maanna Demokraatini siulittaasuugallartup nassuerutigaa, Randi Vestergaard Evaldsenip aamma Niels Thomsenip suleqataajunnaarnerat partiimi sulinermut ilungersunarnerulissasoq.
- Politikkimi sakkortoorujussuusumi naatsorsuutigisinnaanngilarput, tamatigut uninngaannartarnissaat, immaqaluunniit ingerlaannarnissaat, taamaattumik piareersimaffigisarnikuuvagut, partii ajalusoornissaminut ungasinniassammat, pitsaasunik suppleanteqarnerput ernumanngitsorujussuarmik inissisimatippaatigut, Nivi Olsen taama oqarpoq.
Randi Vestergaard Evaldsen qinigaaffimminit tunuaraluarluni partiimi siulittaasup tulliatut ingerlaannassaaq.
