Ullumikkut – decembarip ulluisa aallaqqaataat – AIDS-imut nunarsuaq tamakkerlugu aamma ulloritinneqartartoq.
Ullup matuma, decembarip ulluisa aallaqqaataata, nunarsuaq tamakkerlugu AIDS-imut ulloritinneqartarnissaa Naalagaaffiit Peqatigiit 1988-imi aalajangerpaat.
AIDS-ip ullua Kalaallit Nunaanni ullumikkut immikkut malunnartinniarneqanngilaq – Danmarkimili Peqatigiiffik pisarnertut aaqqissuussivoq, tassami HIV-p uumasuaraanik tunillatsissimasut, napparsimanerullu kingunerisinnaasai, paasisitsiniutigineqarnissaat Danmarkimi nunanilumi allani suli pingaaruteqaqimmat.
39 millionit missaat nunarsuaq tamakkerlugu HIV-mik tunillatsissimapput, 2,8 millionillu siorna 2005-iinnarmi nappaammit taassumannga toqquteqarput.
Kalaallit Nunaanni HIV-mik tunillatsissimasut ukioq manna sisamaapput – siornamut naleqqiullugu ikinnerulaalaarlutik. Tallimat ukioq manna toqquteqarput.
Atoqateqartilluni usuup puuanik atuisarnissap pingaaruteqassusia Paarisap aviisitigut nuna tamakkerlugu paasisitsiniaassutigaa.
KNR-TV-kkut ippassaq aamma aallakaatinneqarpoq aallakaatitassiaq oqallissaarutaasoq: ”Qanga Kingu” – taassumalu immikkoortuata aappaa decembarip ulluisa arfineq-pingajuanni aallakaatinneqassaaq.