Decembarimi akissarsiat juullereernerani nakkartalissapput
Pisortani atorfillit akissarsiaminnik juullertinnagu tigusisarneq sungiusimaavaat, taamaalilluni sapaassuarni pissaqarluarneq atugaasarluni. Kisiannili tamanna oqaluttuaannanngulerpoq. Taamatut akissarsitiseriaaseq ukioq mannamiit atuutilersumik unitsinneqassasoq Naalakkersuisut aalajangeqqammerpaat.
- Ileqqqutoqaq isumalluutinik immikkut atuiffiusartoq iliuuseqarfigiinnarparput. Taama oqarpoq nunatta aningaasiviata paarsisua, Aningaasaqarnermut Naalakkersuisoq, Maliina Abelsen.
Isumalluutit immikkut ittut tassaapput Akissarsialeriviup decemberimi akissarsiat nakkartinneqartarnerannut sulisunik atuisarneri, minnerunngitsumillu Nunatta Karsianut imaqarpianngitsumut aningaasanik tigoriaannarnik tatisisarnera, Maliina Abelsen nalunaarpoq.
Siusinaartumimmi akissarsisitsinermi Nunatta Karsianniit 60 millionit amma 70 millionit koruunit missaat anisarput, Namminersorlutik Oqartussat ataatsimut tapiissutaasa nakkarnissaat ullunik arfineq-pingasunik qulinilluunniit sioqqutisumik. Tamattoqarneralu uninngasuutinik tatisisarpoq, minnerpaamillu 600 millionit koruuninik uninngasuuteqarnissamut allaat uloriarnartorsiortitsisinnaalluni.
Allannguinerulli kinguneqaatissaa tassaassaaq inunnut ataasiakkaanut akissarsisunut uninngasuutaannut tatisineq, taama isumaqarput sulisartut peqatigiiffii. Tamannalu ilaqutariit pitsaasumik juullisiornissaraluannut annertuumik eqquissaaq.
- Ilaasortagut akissarsiakereeqisut naammattusaarereeqisullu suli ajornerusumik eqqorneqassapput taamatullu periaaseq eqqunneqarpat tammanna ilaasortatsinnut annertuumik eqquisussaavoq. Minnerunngitsumik meeqqanut. Taamatut aalajangeramik tamanna eqqarsaatigilluarsimanngilaat, SIK-p siulittaasua Jess G. Berthelsen oqarpoq. Taanna aamma ilinniartitsisut kattuffiannut IMAK-mut isumaqataalluinnarpoq.
- Sulisartunut tamanna ajorseriaataassaaq tassami aningaasat tigoriaannaatit ajorseriaateqassammata. Tamaana ukiorpassuarni ileqquusimavoq taamatullu ileqqoqarsimagaanni isumatigiissutitulli akuerisatut isigineqartarput. Taama oqarpoq, IMAK-p siulittaasua Sivso Dorph.
Aningaasaqarnermulli Naalakkersuisoq isumaqanngilaq allannguineq sulisartunut ajorseriaateqarnermik kinguneqartariaqanngitsoq.
- Juulli sioqqullugu akissarsinermi aningaasanik amerlanernik pissarsisoqarneq ajorpoq. Kisianni tassa siusissukkut aalajangerpugut maannakkullu tusarliullugu, tassami tamanna ilisimareeraanni sipaaruteqarnissamut maanna periarfissaavoq, Aningaasaqarnermut Naalakkersuisoq oqarpoq.