Ujaqqat pillugit paasissutissaasivik aningaasaliisussarsiutaassaaq
Aatsitassanullu naalakkersuisoqarfik taamaaliorsimasoq 2015-imut ukiumoortumik nalunaarusiami sapaatip akunnerata siuliani saqqummersumi atuarneqarsinnaavoq.
Nunatsinni paasissutissanik ujarassiornerneersunik paasissutissaasiviit nutaat pingasut nunallu assingi ujarassiornermik atugassat nutarterneqarsimasut nalunaarusiami ilaatigut oqaluttuarineqarput.
Nunatsinni aatsitassarsiornermi ineriartortitsinissaq pingaaruteqarluinnartoq aatsitassanut naalakkersuisoqarfimmi ujarassiornermut pisortaq Julie Hollis oqarpoq.
Aamma atuaruk Ujarannguussimasut saqqummersinneqarnissaat tamatsinnut iluaqutaasussaasut
- Nunat assinginut ujarassiornermut atugassanut paasissutissanullu nutaanut aningaasaliinikkut tamanullu atorneqarsinnaatitsinikkut Nunatsinnut soqutiginnilersitsinissaq aningaasaleerusussuseqalersitsinissarlu ajornannginnerulissasoq ilisimaneqarpoq, Julie Hollis oqarpoq.
Ujaqqat qanoq pisoqaassuseqarnerannik paasissutissanik siorna nalunaarsuiffiliorput. Paasissutissaallu ukiuni tulliuttuni ilaartorneqassapput.
Ujaqqallu pisoqaassusaannik paasissutissat katersat suliffeqarfinnit, nunatsinni misissuerusuttunit, iluaqutigilluarneqarsinnaasut, Julie Hollisip oqaatigaa.
- Ujaqqat qanoq pisoqaatiginerannik nalunaarsuiffik suliffeqarfiit sumi ujaasinissaminnik aalajangiiniarnerminnut iluaqutisssaraat, aatsitassallu qanoq qaleriiaarnerannik uuttuusiatik ajunnginnersut taakkuninnga aamma takusinnaallugit.
Aatsitassat ilaat ujaqqanut aalajangersimasunik pisoqaassusilinnut attuumakkajuttarput, ujaqqallu pisoqaassusaat ilisimagaanni aatsitassat qanoq ittut naammattooratarsinnaallugit oqaatigikannerneqarsinnaavoq.
