Danskit politikerit akuunerulersitsiniarnermut isuma akerleraat

Kalaallit Danmarkimi kommunini akuunerulersitsiniarnermi siunnersuisoqatigiivini peqataatinneqarnissaannik siunnersuut Danmarkimi politikerinit tapersersorneqanngilaq.

Siunnersuut, Inuit pisinnaatitaaffii pillugit ilisimatusarfiup kalaallit Danmarkimiittut naligiimmik pineqarnissaat pillugu nalunaarusiamini sapaatit akunnera kingullermi saqqummiussaa. Socialdemokratiniilli itigartinneqartoq.

- Uanga isumaqarpunga, ullumikkutut iinnassasoq, socialdemokratit nunarput pillugu oqaaseqartartuat, Karin Gaardsted, KNR-imut oqarpoq.

Ullumikkut qimaasut nunasisullu nunanit allaneersut siunnersuisoqatigiinni, kommunalbestyrelsenik kommunillu ingerlatsinerini inuiaat ikinnerussuteqartunik oqaluuserisaqalersillugit siunnersuisartuupput.

Aamma atuaruk NALUNAARUSIAQ Danmarkimi kommuunit siunnersuisoqatigiivini kalaallit peqataalik

Siunnersuisoqatigiit nunasisunuinnaavoq
Danskit akuunerulersitsinissamut inatsisaanni kapitali 8-mi ima allassimasoqarpoq: ’Ilaasortat qimaasut nunasisullu peqatigiiffiini ilaasortanit toqqarneqassapput kommunimiluunniit innuttaasunit taakkununnga assingusunik’.

Taamaattumillu kalaallinit kingoqqisut ilaasariaqarput, Inuit pisinnaatitaaffii pillugit ilisimatusarfik isumaqarpoq. Taamaalisoqarpat kalaallit danskit tamanut sullissiviini naligiinnerusumik pineqalissapput.

Tamanna aamma nuna tamakkerlugu Inuiaat ikinnerussuteqartut siunnersuisoqatigiivini atuuppoq, tassani danskit illoqarfiisa annerit sisamat akuunerulersitsiniarnermi siunnersuisoqatigiivinit ilaasortanit ilaasortaqarpoq. ’Danmarkimi kalaallit amerlanerussuteqartut akuunerulersitsiniarnermi siunnersuisoqatigiinni ilaasortaarusuppata, uanga akerliunavianngilanga’, Inuiaat ikinnerussuteqartut siunnersuisoqatigiivini siulersuisoq Yasar Cakmak KNR-imut oqarpoq.

Kommunilli kalaallillu pisariaqartinngilaat akuunerulersitsiarnermi siunnersuisoqatigiinni kalaalertaqarnissaat, Karin Gaardsted isumaqarpoq.

- Kommuneni kalaaleqarfiulluartuni pineqartuni, suleqatigiilluarnissaq kommunemilu sulisut akornanni anguniarneqartariaqarpoq. Tamanna siunnersuisoqatigiinni issiatitaqarnikkut pivallaarnagu qallunaatut innuttaassuseqarneq uani pingaartinneqarnerusariaqartoq, Karin Gaardsted isumaqarpoq.

Naalakkersuisunik tapersersuisut isumaqatigiinngillat

Dansk Folkepartiip nunarput pillugu oqaaseqartartuata, Søren Espersenip, isuma akerleraa.

- Naamik. Aatsaat ulloq taanna kalaallit namminerisaminnik naalagaaffeqalerpata. Tassami danskisut innuttaassuseqanngitsut akornanni danskisut innuttaassuseqanngitsunik kunngeqarfiup avataaneersunik akuulersitsiniarnermi kalaallit issiasariaqanngillat, KNR-imut oqarpoq.

Liberal Alliancekkunni nunarput pillugu oqaaseqartartup Carsten Bachip siunnersuut ammaffigineruaa.

- Danmarkimi kalaallinut periarfissaasinnaavoq politikikkut toqqaannarnerusumik attaveqalernissamut, ingammik kommunini. Isumaqarpungali pingaartoq erseqqissassallugu kalaallit Danmarkimiittut akornanni ilumut pisariaqartinneqarnersoq oqallisigineqaqqaarnissaa pingaaruteqartoq, Carsten Bach KNR-imut oqarpoq.

Naalakkersuisuutitaqartut Venstre pineqartoq pillugu oqaaseqartissinnaasimanngilavut,

Siumut Inuit Ataqatigiillu siunnersuut tapersersorpaat.