Danskit politikeriisa Aleqa iliuuseqarfiginianngikkaat
Aleqap Folketingimit kreditkorterisaminik atornerluisimanera Christiansborgimi suleqatigiinnermut sunniuteqassanngilaq, danskit partiivinit taama oqaatigineqarpoq.
Aleqa Hammondip Folketingimit kreditkorterisaminik imminut pisiortorsimanera Siumup Folketingimi partiimik Socialdemokraatinik suleqateqarneranut sunniuteqassanngilaq.
- Suleqatigiinnermut sunniuteqassanngilaq, isumaqarpunga uannut politikeritut tamanna susassaqarfiginagu. Politikerip pineqartup Folketingillu Allaffeqarfiata akunnerminni aaqqinniagassaraat, Socialdemokraatit Kalaallit Nunaannut tunngasunut oqaaseqartartuat, Karin Gaardsted, taama oqarpoq.
Aleqa Hammondip Folketingimit kreditkorterisani atorlugu 13.000 koruunit missaata nalinginut imminut pisiortorsimanera sapaatit-akunnerata naanerani saqqummiunneqarpoq, kingornalu Folketingip Allaffeqarfiani aningaasaqarnermut pisortap Allan Blomip Siumullu tusagassiorfinnut nalunaarutigaat aningaasat akiligassat politikerip tulliani qaammammusinerani ilanngaatigineqassasut.
Aamma atuaruk Aleqap aningaasat utertinniarpai
Aleqa Hammondip tusagassiorfinnut nalunaaruteqarluni ajuusaarnerarpoq, 'ataatsimiinnerup ingerlanerani oqaatigaara ajuusaarutigalugu aningaasatigut atuisimaneq ajornartoornermi atorneqarsinnaaneranut tunngasoq '.
Karin Gaardstedip Aleqa Hammondip Folketingimit kreditkorterisani atorlugu imminut pisiortorsimanera eqqunngitsuliornertut isigigaluarlugu Hammond suli tatiginerarpaa.
- Matumanimi suliaq politikkimut attuumassuteqanngilaq, Gaardsted oqarpoq.
Politikerit akornanni mamiatsatsitsivoq
Folketingip Kalaallit Nunaannut tunngasunut ataatsimiititaliaani siulittaasup Venstremeersup Marcus Knuthip pisoq oqaaseqarfigiumanngilaa. Aamma SF-ip Inuit Ataqatigiillu oqaaseqarfigerusunngilaat.
Politikerilli arlallit KNR-imut oqaatigaat tusagaq Christiansborgimi 'mamiatsaatigineqartoq'.
Paasissutissat KNR-imit pissarsiarisavut naapertorlugit, politikerip pissutsit imminut tunngasut pillugit Folketingip Allaffeqarfiani aningaasaqarnermut pisortamik ataatsimeeqateqarnera nalinginnaasuunngilaq.
Aamma atuaruk Kim Kielsen: Aleqap kreditkortimik atuinera akuersaarneqarsinnaanngilaq
Dansk Folkepartiip Kalaallit Nunaannut tunngasunut oqaaseqartartuata Søren Espersenip politikerit Folketingimit kreditkorterisamik sunut atuisinnaanerat qularutigineqassanngitsoq oqaatigaa:
- Guldkorti Folketingimi ilaasortanut tamanut tunniunneqartoq, assersuutigalugu Københavnimi Hovedbanegårdimit mittarfimmiillu Folketingimut taxarnermuinnaq atoqqusaavoq. Tamannalu arlaleriarlugu ilisimatitsissutigineqartarpoq, Espersen oqarpoq.
Espersen naapertorlugu Aleqa Hammond aamma immikkut ittumik akisussaaffeqarpoq.
- Siornatigut pisimasut eqqarsaatigalugit, Aleqa Hammond pisortanit korterisaminik atuisarsimanermigut tamanna uatsinnit eqqumaffiginerusariaqaraluarpaa.
Espersen: Uagut suliassarinngilarput
Taamaakkaluartoq pisoq Dansk Folkepartiip Aleqa Hammondimik suleqateqarneranut kinguneqassanngitsoq, Søren Espersenip erseqqissaatigaa.
- Allannguuteqassanngilaq. Kalaallit Nunaannut tunngasunut ataatsimiititaliami Folketingimilu ilaasortat suleqatigisussaavagut. Tamakkulu qanoq naliliiffigineqassanersut uagut suliassarinngilarput.
Kalaallit Nunaannili qinersisartut Aleqa Hammondip tatigineqarneranik nalilersuisariaqartut, Espersenip oqaatigaa.
Aamma atuaruk VIDEO Aleqap 12.983 koruunit Folketingetimit atorpai
- Uagut suliassarinngilarput. Kalaallit Nunaanni qinersisartuisa partiiatalu nalilersugassaraat. Uaguunngitsoq. Folketingimut qinigaasimasut uagut oqaloqatigissavagut.
Folketingip Kalaallit Nunaannut tunngasunut ataatsimiititaliaa Nunatsinnut ulluni arfineq-pingasuni paasisassarsioriartorluni sisamanngorpat aallassaaq. Angalanerlu taanna Aleqa Hammondip ataatsimiititaliami siulittaasup tulliatut siuttuuffigissavaa.
