Danskit nunatsinni uranimik piiaaqqusinngillat
Christiansborgimi partiit naalakkersuisuutitaqartut Socialdemokraatit aamma Det Radikale Venstre Folketingimi amerlanerussuteqartut peqatigalugit isumaqarput, kalaallit akuersaanngilluinnarnerup atorunnaarsinnissaanik kissaateqarpata taamaaliuinnarsinnaasut.
Partiit naalakkersuutitaqartut pingajuata, SF-ip, akuersaanngilluinnarnerup atorunnaarsinnissaa tapersersissanerlugu imaluunnit itigartissanerlugu suli isummerfigisimanngilaa. Naalakkersuisut atorunnaarsitsinissamik kissaateqassagaluarpata partiip aatsaat tamanna isummerfigerusuppaa.
Qaqutigoortumik Enhedslisten aamma Venstre isumaqatigiipput. Akuersaanngilluinnarnerup atorunnaarsinnissaa isumaqataaffiginngilaat. Akuersaanngilluinnarneq tassaavoq aatsitassanik piiaanermi qinngornerit ulorianartut annertunerpaaffissaannik qummut killiliussaq. Killiliussaq taannaa maannakkorpiaq tonsimut ataatsimut urani 60 grammiuvoq (60 ppm). Kuannersuarni misiligutissatut tigusat takutippaat uraneqassusaa 350 ppm-iusoq, akuersaanngilluinnarnerlu atorunnaarsinneqanngippat, Greenland Minerals & Energyp piiaaviliorluni milliarderpassuarnik aningaasaliinissaa piviusunngorsinnaanngilaq.
