Danskit nunarput pillugu alapernaannerulersut
Julie Berthelsenip TV2-p aallakkaatittagaani Allstarsimi peqataanera. Gintbergip avinngarusimasunik TV-kkut allakaatitassioqattaarnermini Nuumiinnera. TV3-p Politeeqarfiit pillugu nangeqattaartunik aallakaatitseqattaarnermini Nuummiinnera. Pissanganartuliaralugu TV-kkut aallakaatitassiap nangeqattaartup, Borgenip, immikkoortua Nunatsinnut tunngasoq. Danskit tusagassiutaasa suliaqartarnerminni Nunarput annerujartortumik ilannguttaleraat assersuutissarpassuaqarpoq. Danskit Nunarput pillugu alaatsinaannerulersimapput - qanga pisimasut oqaluttuatoqqallu piinnarnagit, Aammali Nunarput nutaliaasoq pillugu. Ineriartornerlu taamaakkami nuanneqisoq, inuiannut ikinnerussuteqartunut Københavnip Unersitetiata misissuiviani ilinniartitsisoq, Kirsten Thisted, oqarpoq.
- Ilisimasaqarnerulerneq alaatsinaannerulersitsisarpoq, suli ilisimasaqarnerulernermik aamma kinguneqartumik. Taamaammat ineriartorneq pitsaasoq nalaapparput, Kirsten Thisted oqarpoq.
- Tusagassiutini kalaallit Nunaata sammineqarnerini tamani, atuakkani oqallissaarutaasuni maanna saqqummersuni, tamani, kalaallit nipaat tusarsaanerujartuinnappput. Tassalu oqallinneq naligiissut akornanni oqallinerujartorpoq, tassungalumi aamma ingerlaartussaavugut, Kirsten Thisted oqarpoq.
Taannalu aamma oqarpoq, danskit tusagassiutaasa Nunarput siusinnerusukkut assigiiaarnerusumik oqaluttuariniartarsimagaat.
- Kalaallit inuunermik nutaaliaasumik paasinnissinnaanngitsuunerarlugit inerniliisunik, piviusulersaarutinik aallakaatitassiornissaq ungasissorsuunngitsumut allaat ajornanngitsuaraasimavoq. Tassalu inooqataanikkut ajornartorsiuterpassuit, allappassuillu oqaluuserissallugit saqqummiussuunneqartartut.
Taamaattunik aallakaatitassiortoqaraangat, Nunatsinniit amerlasuutigut nipangiutiinnarneqartarput. Kirsten Thistedili isumaqarpoq, aallakaatitaq ”Kalaallit Nunaanniit qimaaneq” allaanerusumik pissusileqalernermik ersersitsisoq. Piviusulersaarutip taassuma inooqatigiinnikkut ajornartorsiutit, peqquserlulluni iluanaarniarneq kammalaatersornerlu sammimmagit, kalaallit sakkortuumik akerliupput.
- Taama ittumik saqqummiussisoqarmat kamattoqaqaaq, aammalu tusagassiutit kalaallit Nunaannilu pillugit oqallinnermik sukumiisumik pilersitsilluni. Aammalumi piviusulersaarut taannarpiaq danskit tusagassiortut ilinniarfigisimassagaat ilimagaara. Tassalu kalaallit saqqumiunneqartarnerannik sivisuumik ileqquuusimasoq qaangiuttariaqalersoq, Kirsten Thisted oqarpoq.
Taanna isumaqarpoq, namminersornerup Kalaallit Nunaanni eqqunneqarnera allanngornermut aalajangiisuulluinnartoq.
- Tupaallannaqaaq, namminersornerup Kalaallit Nunaanni eqqunneqartorlu, Nuuk danskit illoqarfiattut ilanngunneqartalermat. Kisianni tassa ilisimasatoqavoq, ilaalersitsinissamut naligiinneq pisariaqarpoq, Kirsten Thisted oqarpoq.
