Danskit nunanut allanut ministeriata kalaallit pilluaqquai
- Aallaqqaasiutigalugu Kalaallit Nunaanni partiit tamaasa inuiaallu kalaallit qineqqusaarluarsimanerannik qinersinerullu inerneranut kusanartumut pilluaqqorusuppakka. Danskit nunanut allanut ministeriat Martin Lidegaard taama oqarpoq.
Qinersinerup inernera Siumup Inuit Ataqatigiillu qinersisartuisa akornanni annertuumik avissaartuuttoqarneranik takutitsigaluartoq, Naalakkersuisooqatigiinnik nukittuunik pilersitsisoqarnissaa isumalluarfigaa.
- Inatsisartuni kikkut naalakkersuisunngortitsigaluarpataluunniit, naalakkersuisooqatigiit atituumik suleqatigiinniarnissaat neriuutigaara. Ajornartorsiorfimmimi tamanna orniginarnerpaajusarpoq. Tamanna Danmarkimi aamma nalaannikuuarput - imaannaanngitsuusorlu oqaatigisinnaallugu - aningaasalersuerusuttunullu pilerinarsaassagaanni ajornartorsiutaasullu siunissaq ungasinnerusoq eqqarsaatigalugu aaqqiissuteqarfigerusukkaanni tamanna orniginarnerpaavoq.
Kalaallit Nunaata iluani suleqatigiinneq Danmarkip peqatigineranut aamma pingaaruteqartupilussuuvoq, ilaatigummi Kalaallit Nunaannut nutaanik aningaasalersuinissaq ukiuni kingullerni sulissutigineqarmat, Martin Lidegaard oqarpoq.
- Taamatut suliniuteqarnerup ingerlaqqinnissaa naatsorsuutigaara, Kalaallit Nunaatami aningaasaqarnerata siumut-saatsinniarnissaanut tamanna pisariaqarluinnarpoq. Aamma danskit naalakkersuisuisa tungaannit oqaatigisinnaavara suliassaqarfiit kalaallit naalakkersuisortaavisa suleqatigiissutigerusutaat tamaasa piareersimaffigigatsigit. Isumaqarpunga Kalaallit Nunaat tunniussassarpassuaqartoq, maanimi Danmarkimi qangali ilisimavarput Kalaallit Nunaat Naalagaaffeqatigiinni pisariaqartillutigu. Kalaallit Nunaat iluaqutigilluarparput, taamaammat aamma Kalaallit Nunaata suleqatigiinnerup nukittunerulersinnissaanut piumassuseqarnissaa peqatigiillutalu inuiaqatigiit kalaallit pitsaasumik angusaqarfiginissaat neriuutigaarput.
