Danskit coronaviruseqarlutik napparsimmavimmiittut 186-iupput – 37-llu peruluttut inaanniillutik

Danmarkimi tunillatsissimasut napparsimmavinni uninngasut tallimanngornermi 186-iupput. Tamanna sisamanngornermi uninngasunit 153-init amerleriarneruvoq. Statens Serum Institut taama paasissutissiivoq.

Uninngasunit 37-t peruluttut uninngavianniipput. Taakkunanngalu 32-t anersaartuuteqartariaqarlutik

Uninngasut ataasinngornerrmit pingasoriaammik amerlipput. Danskit peqqinnissaqarfiisa tunillatsittut amerliartornerat ilutigaluga napparsimmavimmut unitsinneqartut sapaatini-akunnerni aggersuni amerliartussangatippaat.

Danmarkimi napparsimmavinnut ilungersungaatsiartitsinissaa ilimagineqarpoq. Taamaammat coronamik tunillatsissimasut inissaqartinniarlugit pilattaalluni suliarinninnissat pinartuunngitsut tamarmik kinguartinneqarput.

AAMMA ATUARUK Tamaat isigalugu: Coronavirus pillugu killiffik

Tamatuma saniatigut nakorsat peqqissaasullu allanik immikkut ilisimasaqartut peruluttut uninngavianni sulinissamut ilinniartinneqalerput.

Taakku coronamik tunillatsissimasut perulunnerusut pisariaqartitaannik tassa anersaartuutinik atortulersuuteqarnerit ilaatigut ilinniassavaat.

Qulingiluat toqusut 

Danmarkimi coronavirusimik tunillatsissimallutik toqquteqarsimasut maanna qulingiluaapput. Taakkuli tunillatsinnikuusimagaluartut tamanna toqunerannut pissutaasimasariaqanngilaq. Toqusut qassiiusut peruluuteqarlutik nappaateqareersuupput. Tamanna Danmarkimi nunap immikkoortuini napparsimmaviit qassiiusut paasissutissiissutigaat.

Kisitsisitigut naatsorsueqqissaarnermi tunillatsissimallutik toqquteqartut coronavirusimik tunillatsinnerminnit ullut 60-it qaangiutinngitsut allassimavoq.

Napparsimasut isumannaatsuunissaat pillugu aqutsioqarfiup oqarnera naapertorlugu danskit 580.000-it upernaap ingerlanerani coronavirusimik tunillatseratarsinnaapput.

AAMMA ATUARUK Nuummi inerteqqutit nutaat: 1500 koruunimik akiligassinneqarsinnaavutit

Eqimattanik taakkuninnga naliliinerup saniatigut tunillatsittut 11.200-it napparsimangaaramik napparsimmavimmut unitsinneqartariaqassangatinneqarput, taakkunanngalu 2800-it peruluttut uninngavianniittariaqassasut nalilerneqarpoq. Tamannali piffissami ataatsikkut pinavianngilaq, piffissalli ingerlaneraniussalluni.

Naliliinerup saniatigut danskit 1680-it aamma 5600-it akornanniittut coronavirusimik tunillatsissimanerminni toqusinnaasut nalilerneqarpoq.