Mette Frederiksen angerlarsimaannassalluni aalajangertoq
Danskit ministeriunerat, Mette Frederiksen (S), coronavirusimik Christiansborgimi tunillatsittoqareersorlu angerlarsimaannassalluni aalajangermat, Folketingimi ippassaq marlunngornermi oqallinnissaraluit tamaasa taamaatinneqarput.
Taamaatitseqqittaassappullu. Danskimmi inatsiseqarnermut ministeriat Nick Hækkerup coronavirusimik tunillanneqarsimallunilu covid-19-imik nappaateqarnermik ersiuteqarluni, Danmarkip nalunaaqutaa naapertorlugu pingasunngornermut unnuaani nalunaarpoq.
Frederiksenillu Hækkerup sapaatit akunnerata siuliani ataatsimeeqatigisimammagu misissortillunilu misissortinnermut akissutisinissaminut angerlarsimaannassalluni aalajangerpoq. Ministeriuneqarfik pingasunngornermi taama ilisimatitsivoq.
- Danskit ministeriunerat inatsiseqarnermullu ministeriat 2020-mi tallimanngorneq oktobarip ulluisa 30-anni ataatsimeeqatigiinnerminni qanillinaveersaarnermut il.il. maleruagassat tamaasa naapertorpaat. Ministeriuneq COVID-19-imik nappaateqarnermik massakkorpiaq ersiuteqanngilaq, sapinngisamillu attaveqaatit atorlugit ataatsimeeqateqateqartarluni suliinnarallassaaq, ministeriuneqarfik ilisimatitsivoq.
AAMMA ATUARUK Folketingi coronavirusimik tunillatsittoqareersorlu matusoq
Taamaammat Folketingimi ilaasortat nunatsinneersut Savalimmiuneersullu ministeriunermut apeqqarissaaqataanissaraluat piffissaligaanngitsumik kinguartinneqarpoq.
Marlunngornermi apeqqarissaarnissaraluat pingasunngornermut kinguartinneqarpoq. Frederiksenilli angerlarsimaannassalluni aalajangermat kinguartinneqaqqippoq.
Tamatuma saniatigut ministerit allat arfineq-marluk folketingimi ilaasortanik coronavirusimik tunillatsissimasutut paasineqaqqammertunik ataatsimeeqateqarsimapput.
Ministerit maanna angerlarsimaannaqquneqartut katillutik 13-iupput.