Danskit ministeriat Løkkep mittarfiit pillugit neqoorutaa pillugu nassuiaatinneqassasoq
Enhedslistenip Kalaallit Nunaannut tunngasunut oqaaseqartartuata Christian Juhlip siunersioqatigiittoqarnissaa kissaatigisimavaa. Statsministerip Lars Løkke Rasmussenip Kalaallit Nunaanni politikkikkut sulinermut akuliussimanera taassuma isornartorsiorpaa.
Statsministerimi septembarimi nunatsinnukarpoq, Nuummi Ilulissanilu mittarfiit tallilerneqarnissaannut katillugit 1,6 milliardit koruuninik aningaasaleeqataasoqarnissaa tassani atsioqatigiissutigalugu.
- Iluarinngisara tassaavoq ministeriunerup nunami politikkikkut sunniuteqartumik Kalaallit Nunaannukarluni aningaasarpassuarnik neqerooruteqarnera, Christian Juhl, septembarip ulluisa 14-ianni isornartorsiuinermini ilaatigut oqarpoq.
AAMMA ATUARUK Løkkep Nuuliarnera Enhedslistenip SF-illu isumaqatigiinngissutigigaat
Statsministerip Kim Kielsenillu isumaqatigiissutaat pissutaalluni Partii Naleraq naalakkersuisoqatigiinnit taamanikkut tunuarpoq.
Naalagaaffiup Kalaallit Nunaanni mittarfinnut aningaasaleeqataanermigut qanoq angusaqarnissani naatsorsuuteqarfiginerai Kristian Jensenip ilaatigut akissuteqarfigissavaa, statsministerillu Kalaallit Nunaanni mittarfinnik nutaanik sanaartorneq piviususorsiornerunngitsoq 2017-imi oqaatsini sooq allanngortissimanerai, aningaasaqarnermut ministerip aamma akissuteqarfigissavaa.
AAMMA ATUARUK Løkke Nuummi Ilulissanilu mittarfinnik piginneqataarusuttoq
Siunersioqatigiinnerli isummanik allanngortitsingaarnaviarunanngilaq.
Naalakkersuisoqatigiilersummi Demokraatillu Nuummi Ilulissanilu mittarfiit tallilerneqarnissaat, Qaqortumilu mittarfiliortoqarnissaa ippassaq isumaqatigiissutigaat. Naalagaaffiup mittarfliortiternernut aningaassaleeqataanissaa pillugu statsministerip neqeroorutaa matuma tunuliaqutaavoq.
AAMMA ATUARUK Naalakkersuisooqatigiilersut Demokraatillu mittarfiit pillugit atsioqatigiissuteqartut
