Danskit ministereqarfiata inissiinermut suliaq Naalagaaffiit Peqatigiinnut oqaluuseriniaraa
Isumaginninnermut Ineqarnermullu ministereqarfiup Naalagaaffiit Peqatigiinnit allagaq, Danmarkimi pinngitsaaliissummik inissiisarnermut ernumassuteqarnermut tunngassuteqartoq maanna qisuariarfigaa.
Suliaq Keira Kronvoldimut, paniminik Zammimik inunngornerata kingorna qaammatit 18-it matuma siorna pinngitsaaliissummik arsaarneqartumut tunngassuteqarpoq.
Pinngitsaaliissummik inissiineq angajoqqaanik piginnaasanik misissuutinik, naggueqatigiinnut inunnut naleqqutinngitsutut isornartorsiorneqartunik ilaatigut tunngaveqarpoq. Misissuutit danskit kulturiat oqaasiilu tunngavigalugit suliaasutut ilaatigut isornartorsiorneqarput.
Naalagaaffiit Peqatigiinnit nalunaarsuisartut pingasut kalaallinut angajoqqaanik misissuutinik atuineq “inuiannik immikkoortitsinerusinnaasoq”, danskit naalakkersuisuinut allappaat. The Guardian taama allaaserisaqarpoq.
Isumaginninnermut Ineqarnermullu ministereqarfiup allakkatigut KNR-ip takunniffigisaani akissummini Naalagaaffiit Peqatigiinnit atorfillit pingasut suliamik oqaluuserinneqatigerusullugit allappaa. Ministereqarfiup tamanna Naalagaaffiit Peqatigiit Europami qullersaqarfigisaanni, Genèvemi imaluunniit Københavnimi pisinnaasoq siunnersuutigaa.
- Københavnimi ataatsimiinneq Odensemut immikkut ilisimasaqarfimmut, kalaallit oqaasiinik kulturiannillu immikkut ilisimasaqartumut, VISO-mut pulaarnissamut aamma periarfissiisinnaasoq, ministereqarfimmit allakkami allassimavoq.
Ministereqarfiup suliaq inummut paasissutissanik mianerisassanik ilaqarnera pissutigalugu allakkatigut tamakkiisumik akissuteqartoqarsinnaanngitsoq ilanngullugu allappaa.
Danmarkimi folketingimut qinersinerup kingorna naalakkersuisoqatigiinnik suli pilersitsisoqannginnera allakkami aamma allassimavoq. Taamaammat akissut Isumaginninnermut Ineqarnermullu ministereqarfimmi atorfilimmit atsiugaavoq.
Naalagaaffiit Peqatigiit inissiinermut tunngaviusoq isornartorsioraat
Naalagaaffiit Peqatigiinnit allagaq Naalagaaffiit Peqatigiit arnanut niviarsiaqqanullu nakuusernermut immikkut nalunaarusiortartua, Reem Alsalem, Naalagaaffiit Peqatigiit nunap inoqqaavisa pisinnaatitaaffii pillugit immikkut nalunaarusiortartoq Albert K. Barume kiisalu ammip qalipaataanik ullutsinni assigiinngisitsineq pillugu immikkut nalunaarusiortartoq Ashwini K.P. allakkamik nassitsisuupput.
Taakku suliami, nunanit tamalaanit tusagassiorfinnit aamma ukkatarineqartumi ernumanartut arlallit oqaatigaat.
Taakku allakkaminni pinngitsaaliissummik inissiineq misissuutinik “naggueqatigiinnit inunnit angajoqqaanut kulturikkut naleqqutinnginnerat” pingaartumik ernumassutigalugu erseqqissaatigaat.
Naalagaaffiit Peqatigiinnit nalunaarusiortartut Keira Kronvoldimut tunngatillugu suliamik suliareqqiineq siusinnerusukkut nalunaarusiani inerniliissutinik tunngaveqarnerummat aamma apeqquserpaat.
Suliaq Danmarkimi nuna tamakkerlugu ilisimasanik siunnersuinermillu suliaqarfiup (VISO) kalaallit kulturiannik oqaasiinillu immikkut ilisimasaqarfiup suliareqqippaa. Zammip angerlarsimaffiup avataanut inissinneqaqqaannarnissaa VISO siorna novembarimi innersuussutigaa.
Tarnikkut kingunerluutaasussat ernumassutigigaat
Naalagaaffiit Peqatigiit suliap Keira Kronvoldimut tarnikkut kingunerluuteqarsimanissaa aamma anaanaasumut meeqqamullu inissiinermi kingunerit pillugit misissueqqissaartoqannginnera aamma ernumassutigalugit oqaatigaat.
Naalagaaffiit Peqatigiit tamatuma saniatigut oqartussat angerlarsimaffimmi tapersersuinissamut imaluunniit kalaallinut ilaqutariinnut inissiinissamut periarfissanik misissuisimannginnerat uparuarpaat.
Naalagaaffiit Peqatigiinnit nalunaarusiortartut suliaq nunani tamalaani inuit pisinnaatitaaffiinut atatillugu ernumassutiginninnerminnik tunngavissiisoq allakkaminni allappaat. Tassani ilaqutariittut inuuneqarnissamik illersuineq, meeqqat pisinnaatitaaffii, assigiinngisinneqannginnissamut pisinnaatitaaffiit kiisalu eqqartuussivitsigut misiliisinnaatitaanermut aamma inatsisitigut periarfissanik pisinnaatitaaffiit ilaatigut pineqarput.
Suliaq, Keira Kronvoldip Zammip pinngitsaaliissummik inissinneqaqqaneranik allanngortitsiniarnerani Danmarkimi eqqartuussisuuneqarfimmi sapaatip akunnerata siuliani tallimanngornermi suliarineqarpoq.
Eqqartuussivimmi suliami Zammip inissinneqarnissaanut misissuutit kalaallinut ilaqutariinnut atorneqartartut isornartorsiorneqartuartut atorneqarnikuummata inissiinermut tunngaviusoq atorsinnaatitaanersoq pineqarpoq. Tallimanngorpat eqqartuussuteqartoqarnissaa naatsorsuutigineqarpoq.
Keira Krovoldip eqqartuussivimmiinnerup kingorna misigisani “ersinartutut pissanganartutullu” nassuiaatigaa.
- Tamanna (pinngitsaaliilluni inissiineq aaqq.) assigiinngitsorpassuartigut uannut sunniuteqarpoq. Sakkortuvoq. Misigissutsikka eqqarsaatikkalu sapinngisara tamaat ilaatigut inissaqartinniartarpakka. Zammi maaniikkaangat qanoq misigisimanersoq aamma maluginiartarpara. Uippakajaassanngilaq, aamma uanga najornerani uippakajaassanngilanga, Keira Kronvold oqarpoq.
