Keira Kronvoldip Thistedimi angerlarsimaffiani siniffeeraq uaasartoq qilaanngusaasalik bamsinik imaqartoq atorneqanngilaq. Nerriveeraq naalungiarsuleriffik milutsitsinermi immummut pitarnaveeqqutinik nangernillu naak Kerira Kronvoldip paniata Zammip inunngorneranit ukioq ataaseq qaangiukkaluartoq suli ammarneqanngitsunik ilioraavigineqarsimasoq siniffeeqqap sanianiippoq.

Zammi Thistedip napparsimmaviani inunngornerminit akunnerit marluk qaangiutiinnartut pinngitsaaliissummik arsaarinnissutigineqarpoq.

Keira Kronvold nunatsinni nunanilu tamalaani ukiup ataatsip ingerlanerani ilisimaneqarlualerpoq. Taassuma oqaluttuassartani KNR-imut siusinnerusukkut oqaluttuaraa. Danmarkimi kalaallit meerartaasa pinngitsaaliissummik arsaarinnissutaasimasut amerlassusaat pissutigalugu akerliussutsimik takutitsinerit aaqqissuunneqartarput. Akerliussutsimik takutitsinerit Zammip pinngitsaaliissummik arsaarinnissutigineqarneranik ilaatigut aallaaveqarput.

Inatsisip nutaap maajip aallaqqaataani atuutilersinneqartup VISO-mit (Danmarkimi nuna tamakkerlugu siunnersuinermik suliaqarfiup aaqq.) kalaallit oqaasiinik kulturiannillu immikkut ilisimasaqarfiup kalaallit meerartaannik angerlarsimaffiup avataanut inissiinermi suliat, angajoqqaat piginnaasaannik misissuiffiusimasut (FKU) suliareqqissagai qulakkeerpaa. 

Nalilersueriaatsimmi danskit oqaasiinut kulturiannullu tulluarsagaapput, taamaattumik nalilersueriaatsit inissiinerni kukkusumik tunngaveqartitsisimasinnaanerat ilaatigut Inuit Pisinnaatitaaffii pillugit Institutimit isornartorsiorneqarnikuupput.

Zammip pinngitsaaliissummik inissinneqarnera VISO-mit suliarineqaqqammerpoq. Immikkut ilisimasaqarfiup nutaap naammassillugu suliarisaani siulliuvoq. Suliareqqiinerulli inernera Keira Kronvoldip neriuutigisaatut inerneqanngilaq. Zammi inissinneqaqqaannassasoq innersuussutigineqarpoq. Keira Kronvoldillu panini sapaatip akunneranut akunnerup aappaata affaani suli najoqatigisinnaavaa.

Aalajangiinerup inernera suliarineqarluni pingasunngornermi  naammassineqarnissaanut Keira Kronvoldip panini angerlarsimaffiup avataanut inissinneqaqqaannassoq ilisimareerpaa. Taanna pingasunngornermi naggasiutitut ataatsimiinnerup kingorna aliasunnini pissutigalugu apersorneqarumanngilaq, suliarli KNR-imut sapaatip akunnerani siusinnerusukkut oqaluttuaraa.

- Zammip suli angerlarsinnaannginnera artornartorujussuuvoq. Annikilliorujussuarpunga, Keira Kronvold oqarpoq.

Isumaginninnermut Ineqarnermullu Aqutsisoqarfimmit innersuussutigineqartoq, KNR-ip takunniffigisaa naapertorlugu “Zammip toqqissisimasumik, patajaatsumik ineriartornissaminullu tapersersorneqarlunilu isumassorneqarnissaanut Keira Kronvold angajoqqaatut piffissami matumani isumaginnissinnaanngikkallartoq nalilerneqarpoq”. Taarsiullugulu eqqarsartaatsikkut nammineq allallu pissusilersuutaannik paasinnilluarsinnaalernissamut, misigissutsikkut aqutsisinnaanissamut isumassuinermilu iliuuseqartarnissamut tapersersorneqangaatsiarlunilu siunnersorneqangaatsiassasoq innersuussutigineqarpoq.

Paasineqartutut misigisimanngitsoq

Immikkut ilisimasaqarfiup VISO-p inissiinermut suliat 24-t maannamut pissarsiarisimavai. Sulianit tallimat naammassineqareersimasut VISO-p paasissutissiissutigaa. Suliaqarfiup suliani ataatsimi tarnikkut misissuutit eqqunngitsumik naliliinermik kinguneqarsimasut nalilerpaa. Suliallu sinnerini sisamani misissuutit eqqunngitsumik naliliinermik kinguneqarsimanngitsut nalilerneqarluni.

Sulianit aqqanillit tarnikkut qanoq innermik misissuutinik atuiffiusimanngimmata itigartitsissutigineqarsimapput. Sulianit tallimat kukkunersiorneqarput, pingasullu misissuiffigineqarlutik.

Keira Kronvoldimut tunngatillugu suliaq aggustimit novembarimut tassa qaammatini sisamani suliarineqarpoq. Misissuinermi tassani Keira Kronvoldip tallimariarlugu oqaloqatigineqarnera, inuit qanittumi attaveqaatigisai, Keirap Zammillu najoqatigiinneranni nakkutiginninnerit ilaatigut ilaapput.

VISO-mi immikkut ilisimasaqarfik kalaallit kulturiannik oqaasiinillu immikkut ilisimasaqarfiuvoq. Taamaakkaluartorli Keira Kronvold Qeqertami peroriartorsimasoq taama misigisimanngilaq.

Taanna kalaallisut oqaatsini kulturinilu eqqarsaatigineqanngitsut misigisimavoq. Naak kalaallisut oqaaseqaraluarluni danskisut oqaloqatigiittoqarnera ilaatigut pissutaapput. Aalajangiineq naapertorlugu Keira Kronvold oqalutseqarumasimanngilaq. Taassuma oqalutseqarnissaq “periarfissaanngimmat” oqalutsissarsiorsimanani nammineq uppernarsarpaa.

Tamatuma saniatigut tarnip pissusianik ilisimasallit suliamut imminut tunngassuteqartut suliaq nammineq isigisaanit kalaallisullu kultureqarnini isiginiarsimanngikkaat misigisimavoq. Tamanna Keira Kronvoldip najortiminit ikiorneqarluni suliap ingerlaneranik naammagittaalliuteqarneranik kinguneqarpoq. KNR-ip naammagittaalliuut takuaa, tassanilu “oqaloqatigiinnerni paasineqartutut misiginissaq ajornakusoorsimasoq” ilaatigut allassimavoq.

- Tarnip pissusianik ilisimasallip asannittuusunga aalaakkaasungalu qarsupittumik eqqaavaa, nalunaarusiarlu tamarmi sunik ajoquteqarnersunga pillugu suliaralugu. Anaanatut ileqqora nikagineqarpoq, kalaalliuneralu paasineqarlunilu ataqqineqarani uannut akerliunermut atorneqarpoq, Keira Kronvold oqarpoq.

Keira Kronvold naak Zammi angerlarsimaffiup avataanut pinngitsaaliissummik inissinneqaqqagaluartoq Zammimut siniffeeqqamik angerlarsimaffimmini suli uninngatitsivoq. Assi © : KNR/Ann-Sophie Greve Møller

Aalajangiineq isornartorsioraa

Keira Kronvoldip ikorfartortaata, Laila Berthelsenip VISO-mik oqaloqatiginninnermi peqataasup aalajangerneq aamma isornartorsiungaatsiarpaa. VISO-p nalunaarusiami Keira Kronvold asannittuullunilu paniminut atatillugu suliniuteqartuusoq aamma ataatsimiinnissamut isumaqatigiissutinik malinnilluartuusoq, aalisakkerivimmilu sulinermini ulluinnarni ingerlatsilluarsinnaasoq nalilerpaa.

- Taamaakkaluartorli nalunaarusiap ataatsimoortumik naliliiffigineqarnerani pissutsit isornartut Keirap isumalluutaanit ineriartornissamullu ilippanaataanit pingaartinneqangaatsiartut misigisimavarput, Laila Bertelsen oqarpoq, nangillunilu:

- Isumaqarpunga tamakkiisumik paasissutissartalimmik, tassa nukissanik ilungersunartunillu sammisaqartumik naliliisoqaraluaruni tamanna assigiinngisitaarnerusumik Keirallu anaanatut periarfissanik naapertuilluarnerusunik takutitsisoqassagaluartoq, minnerunngitsumik taassuma tunuliaqutaa aamma pissutsinik allannguinissamut suliniutigisimasai eqqarsaatigalugit. Aammattaaq Anaanap-Meeqqallu angerlarsimaffiat aqqutigalugu Keirap angajoqqaatut piginnaasaanik ersersitsiniarnermi naliliisoqarsinnaanera pillugu innersuussuteqartoqanngilaq.

KNR-ip isornartorsiuineq VISO-mut saqqummiuppaa. VISO-p innuttaasut inatsisitut isumannaatsuunissaat oqaatiginneqqusaannginnerlu pissutigalugit suliat ataasiakkaat pillugit oqaaseqarsinnaannginnini allakkatigut akissutigaa.

- VISO oqaloqatigiinnermik aallaaveqartumik suliniuteqartoq aamma suleqataasunik, kalaallit oqaasiinik kulturiannillu ilisimasaqartunik tarnip pissusianillu suliaqarnermi piginnaasaqartunik ilanngutititsisoqartuaannartoq ataatsimoortumik oqaatigisinnaavara. Innuttaasut oqalutseqarnissamik allakkallu kalaallisuumut nutserneqarnissaannik neqeroorfigineqartuaannarput, siunnersortit pisortaat, Randi Lykou oqarpoq.

Ilungersuutiginniinnassasoq

Keira Kronvold kommunimit Zammip inunngornissaanut ukiut qulit sioqqullugit ilisimaneqalerpoq. Taassuma meerai siulliit Keira isumaginnissinnaanngitsutut nalilerneqarmat 2015-imi pinngitsaaliissummik arsaarinnissutigineqarput. Taamaammat Keira Kronvoldip Zammimik naartulluni Thistedip kommunia nammineerluni attavigaa.

Tamanna Keira Kronvoldip angerlarsimaffiup avataanut inissiinissap ilaatut angajoqqaatut piginnaasanik misissuinermik aqqusaagaqarneranik kinguneqarpoq. Zammi inunngunngitsorli inissiisoqarnissaa kommunip nalilerpaa, kommunip oqarnera naapertorlugu Keira Kronvold meeqqami marluk siulliit inissinneqarnerisa kingorna naammattumik ineriartorsimanngilaq.

Tamatuma saniatigut oqaaseqarani isikkukkut iliuutsikkullu ersersitsiniarnera danskillu oqaasiinik atuisinnaanera “meeqqamut ajunngitsuunissaanut itisiliisinnaanngippallaartoq” misissuinermi aamma allaqqavoq.

Keira Kronvoldip paniata angajulliup, inersimasunngoreersup inissiisoqarnikuunera nukkamilu Zammip aamma inissinneqartussanngornera isornartorsiornikuuaa. 

Naallu Zammip angerlartinnissaanut neriuutaa annikinnerugaluartoq Keira Kronvold neriuuteqarniaannarluni KNR-imut oqarpoq.

- Naasunik, nerisassanik atisassaanillu pajuttuaannarpara, qamuuteqanillu sanaateqqqammerpara. Pissutsinut akiuutiinnarnissannut iliuuseqarneraara, Keira Kronvold oqarpoq.