Tusagassiuutit: Naalagaaffiit Peqatigiit Danmarkip kalaallinut iliuusai mianersoqqussutigigaat

Danmarkip pinngitsaaliissummik arsaarinninnermut atatillugu angajoqqaanik kalaallinik misissuutinik atuinera "inuiaanik immikkoortitsinerusinnaasoq" Naalagaaffiit Peqatigiit isumaqarput.

The Guardian taama allaaserisaqarpoq.

Naalagaaffiit Peqatigiinnit atorfillit pingasut tuluit tusagassiorfiat naapertorlugu arnanik ilaqutariinnillu allanik kalaallisut tunuliaqutaqartunik isumaginninnermut atatillugu apeqqutinik arlalinnik danskit naalakkersuisuinut akissuteqaqqusillutik allagaqarput.

Taakku "inuit pisinnaatitaaffiinik unioqqutitsisoqarsimanissaanut" tunngavissaqarluarsoralutik allappaat.

Suliaq meeqqanik pinngitsaaliissummik arsaarinninnermut atatillugu angajoqqaanik misissuutinik – FKU-tut ilisimaneqartunik – atuisoqarsimaneranut tunngassuteqarpoq. Aamma nunatsinni.

Misissuutit kalaallit oqaasiinut kulturiannullu naleqqussarneqarsimannginnerat siornatigut isornartorsiorneqangaatsiarpoq.

Isornartorsiuisut oqarnerat naapertorlugu misissuutit angajoqqaat meeraannik arsaarinninnermi kukkusoqartitsisinnaapput.

Naapertuilluartoqarnissaanut periarfissaqarneq

Naalakkersuisut siulittaasorisimasaata, Múte B. Egedep (IA) misissuutit kalaallit kulturiannut naleqqutinngitsutut siusinnerusukkut aamma isornartorsiorpai, kalaallinullu angajoqqaanut tunngatillugu suliani misissuutinik atuineq tamatuma kingorna unitsinneqarpoq.

The Guardianip allaaserisaa naapertorlugu Naalagaaffiit Peqatigiit arnanut niviarsiaqqanullu nakuusernermut immikkut nalunaarusiortartua, Reem Alsalem aamma nunap inoqqaavisa pisinnaatitaaffii pillugit immikkut nalunaarusiortartoq kiisalu ammip qalipaataanik ullutsinni assigiinngisitsineq pillugu immikkut nalunaarusiortartoq allagaqartuupput.

Allagaq apriilip naanerani nassiunneqartoq oqaatigineqarpoq.

- Misissuutit taama ittut kalaallinut angajoqqaanut siunissami atorneqannginnissaannut aalajangernermik naammagisimaarparput, FKU-millu naliliinermik tunngaveqartumik aalajangiiffigineqarsimasut naapertuilluartoqarnissaanut periarfissaqartariaqarlutillu taarsiiffigineqartariaqarput, Naalagaaffiit Peqatigiinnit atorfillit allattut aviisi allappoq. 

Taakku Keira Alexandra Kronvold Thistedimeersoq pillugu suliaq assersuutitut eqqaavaat. Atorfillit oqarnerat naapertorlugu taassuma meeraanik akuersissuteqarfiunngitsumik pinngitsaaliilluni arsaarinnittoqarnissaanut aalajangerneq "assigiinngisitsiffiullunilu naleqqutinngitsuusinnaavoq", taakku oqarput.

Allagaqartut aviisip allaaserisaa naapertorlugu "taassuma kinguaassiornissamut aamma pinaveersaartitsinermut atatillugu ukiut ingerlanerani aalajangertarneranut ersarissumik ataqqinninngitsoqarnera" ilaatigut innersuussutigaat.

The Guardianip allaaserisaa naapertorlugu Alsalemip allamik iliuuseqarnissamut aalajanginnginnermini Kronvoldip eqqartuussivitsigut suliaa malinnaaffigalugulu danskit oqartussaasuisa qanoq qisuariaateqarnissaat takoqqaarniarpaa.

/ritzau/