Danskit: Kalaallit Nunaata nunataata iluaniittut kalaallit pigivaat
Naalagaaffeqatigiinnerup Kalaallit Nunaatalu nunataata ataaniittut pillugit qaammatini kingullerni oqallinneq sakkortuseriarsimagaluartoq, danskit amerlanerussuteqartut, 70,1 pct.-ii isumaqarput, Namminersorneq pillugu inatsisip 2009-mi eqqunneqarneratigut Kalaallit Nunaata nunap ataaniittunik piginnittuunerata naqissuserneqarnera ajorisassaqartinngilaat. Inuit isumaannik misissuineq Rambøll/Analyse Danmarkip Morgenavisen Jyllands-Posten sinnerlugu suliarisimasaa taama inerneqarpoq. 21,7 pct.-iinnaat isumaqarput kukkusumik aalajangisiisoqarsimasoq.
Dansk Folkepartiip, Folketingimi partiini kisiartaalluni namminersorneq pillugu inatsimmik itigartitsisuusup tamanna tupaallaatigisupilusuuaa, danskillu nalinginnaasut akornanni taamatut isumaqartoqannginnera maluginiarsimanerarlugu.
-Tupaallannartupilussuuvoq, aamma taamatut inissisimasoqarnera ilisarisinnaanngilara. Inunnikoqaloqateqaraangama, Danmarkip aatsitassanut oqartussaaffimmik Kalaallit Nunaannut tunniussisisimanera kamaatigisupilussuusarpaat, Kalaallit Nunaat pillugu oqaaseqartartoq Søren Espersen Morgenavisen Jyllands-Postenimut oqarpoq.
Nunatsinni partiit annersaanni siuttuusut, Kuupik Kleistip aamma Aleqa Hammondip danskit namminersorneq pillugu inatsimmik tapersersuinerat nuannaarutigalugulu naammagisimaarpaat.
-Taamaattoqarnera nunannerpoq aammalu ilimanareerluni. Aatsitassat ukiorpassuarni oqallisaasimapput, naak danskit politikerii aatsaat paasinnilersimasutut isikkoqaraluartut. Ilami ilaat isumaqarput uuliasiortuusugut tamattalu kuultinik pinnersaasersorluta inuusugut, Kuupik Kleist danskit aviisiannut oqarpoq.
Siumup siulittaasuanit Aleqa Hammondimit taperserneqarpoq.
-Danskip nalinginnaasup Kalaallit Nunatsinni nammineq pisuussutitsinnut oqartussaanissarput akueraat. Aningaasaqarnikkullu imminut napatissinnaalernissaq nunani marluusuni innuttaasunit aamma tapersersorneqarpoq, Hammond isumaqarpoq.
