Danskit kalaallillu kulturikkut kingornussaat tillinneqartoq
Orsumik uutsiteriviit kanngussamik sanaat KGH-p nalaaneersut marluusut aappaat tillinneqarsimavoq. Uutsiteriviit Issittormiut Illuata kaajaluisaani naasulivigalugit atorneqarput. Tillinniarneq sisamanngormat unnuakkut umiatsiami angerlarsimaffiusumi najugaqartunit politiinut nalunaarutigineqarpoq.
- Tallimanngormat ullaakkut nal. 8.30 missaani Strandgademut apuuppunga, tassanilu suleqatiga atuagaateqarfimmeersoq, Vibeke, politiinik oqaloqateqartoq takullugu. Kaajaluisami issut naasullu sumi tamaaniipput. Orsumik uutsiteriviup aappaa pusinneqarsimavoq kaajaluisarlu assut tukalluni, Arktisk Institutimi pisortaq Bent Nielsen oqaluttuarpoq. Tillinniat uutsiteriviup aappaa ilanngullugu tilleriaraluarsimarpasikkaat aamma oqaatigaa.
Uutsiteriviup periarfeerunneqartup nassaarineqarnissaa ajoraluartumik ilimanarpallaanngilaq.
- Tillinniat nunanut allanut imaluunniit maani Danmarkimi aatitsiterivimmukaatipallassagaat ilimagaarput, kanngussarmi massakkorpiaq akigissaarpoq, Bent Nielsen oqarpoq.
Politiit Arktisk Institutimut nalunaarutigaat sulisussaaleqineq pissutigalugu suliap misissuiffineqarnissaa unitsiinnarlugu. Tamannali instituttip tungaanit naammagineqanngilaq:
- Politiit attaveqarfigeqqissavakka kulturikkullu kingornussatut nalituujunera erseqqissaatigalugu. Holger Danskeunngikkaluarpoq, kisianni Katersugaasivissuarmi oqaluttuarisaanermik ilisimatusartoq sulisullu allat marluk oqaloqatigaakka, taakkulu naqissuserpaat kulturimit immikkuullarissumit kingornussaasut, kulturimillu tassannga takussutissaqarpallaanngitsoq, Bent Nielsen oqarpoq.
Orsumik uutsiteriviup aappaata tillinneqannginnissaa qulakkeerniarlugu Arktisk Institutip aaqqiissutissamik nassaarnissaata tungaanut maanna Illuuteqarnermut aqutsisoqarfimmit paarineqarpoq. Orsumik uutsiteriviit assingi marluk Kalaallit Nunaanniipput, Arktisk Institulli pigisai Danmarkimi kisiartaallutik.
Arktisk Institutip inuit takusaqarsimasinnaasut imaluunniit tusagarsimasinnaasut Københavnimi politiinut Arktisk Institutimulluunniit ilungersorlutik saaffiginneqqusipput.
