Mogens Jensen maannamut sapaatit akunnerit appaata affaani isornartorsiorneqaqaaq.Assi: Scanpix

Danskit inuussutissaqarnermut ministeriat Mogens Jensen tunuartoq

Danskit inuussutissaqarnermut ministeriat Mogens Jensen (S) tunuarpoq. Taanna Folketingimit tatigineerussimasutut misigisimanerarpoq. 

Danskit inuussutissaqarnermut ministeriat Socialdemokratineersoq, Mogens Jensen, minkit tamarmik toqunneqarnissaat qassiiliutaareersorlu tunuarpoq. Taanna Facebookimi taama allappoq.

Mogens Jensen Folketingimit tatigineerussimasutut misigaluni oqarpoq. Danmarkimi minkit tamarmik toqunneqarnissaat inatsisinik unioqqutitsilluni naalakkiutaareersorlu taama oqarpoq.

- Folketingimi partiit amerlanerpaartaannit taperserneqarunnaarnera qularinnginnakku ministeritut tunuarnera ministeriunitsinnut ullumi nalunaarutigaara, Mogens Jensen Facebookimi allappoq.

Danskit naalakkersuisuisa minkit tamarmik toqunneqarnissaannut novembarip ulluisa sisamaanni naalakkiinerat inatsisitigut tunngavissaqanngitsoq ersereersorlu, Mogens Jensen maannamut sapaatit akunnerit appaata affaani isornartorsiorneqaqaaq. Danmarkimi minkit 15 aamma 17 millionit akornanni amerlassuseqarput.

Coronavirusi allanngortumik kinguaassiortoq minkiuteqarfinni siumorneqarmat inunnullu tuniluummat minkit toqunneqarnissaat naalakkiutaavoq. Coronavirusimut akiuussutissaliorneq virusi allanngortumik kinguaassiortoq peqqutaalluni ajornarnerulersinnaavoq. 

AAMMA ATUARUK Danmarkimiit Tuluit Nunaannut tikittut angerlarsimaqqusaasalertut

Tamannali inatsisinik unioqqutitsinerusoq erserpoq. Ministeriunerup inuussutissaqarnermullu ministerip tamanna novembarip ulluisa arfineq-aappaanni arfineq-pingajuannilu paasivaat. Ministeriunerup Mette Frederiksenip tamanna ajuusaarutiginerarpaa, Mogens Jensenili aamma akisussaasuunerarlugu.

Partiit danskit naalakkersuisuinut illua tungiliuttut Mogens Jensen tunuartariaqarsorisimavaat. 

Pisoq pillugu nassuiaat partiinut taakkununnga nassiunneqarpoq, Mogens Jensenillu inatsisinik unioqqutitsilluni naalakkiisoqarsimanera qanga paasisimaneraa tamatumalu kingorna qanoq iliuuseqarsimanersoq nassuiaatigineqarpoq. Nassuiaalli taanna tamanut suli saqqummiunneqanngilaq.

Mogens Jensen poltikkimit tunuarani Facebookimi allappoq:

- Aappara, ilaquttakka ikinngutikkalu maannamiit sammissavakka. Folketingimulli soorunami pinngitsoornanga suliartoqqinnissannut qilanaarpunga.
 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat