Danmarkimiit Tuluit Nunaannut tikittut angerlarsimaqqusaasalertut

Danmarkimiit Tuluit Nunaannut tikittut ulluni 14-ini angerlarsimaqqusaasarnissaat Tuluit Nunaanni ingerlaannartumik atuuttumik atuutilersinneqarpoq. Danmarkimi minkiuteqarfinni tuniluutilerujussuarneq tamatumunnga pissutaavoq.

Tuluit Nunaata assartuinermut ministeria tallimanngornermut unnuaani taama nalunaaruteqarpoq.

Piumasaqaat tallimanngornermi Danmarkimi nalunaaqutaq malillugu tallimaniit atuutilerpoq.

- Danmarkip nunat tikiffiusut angerlarsimaqqusaanermik piumasaqaateqarfiunngitsut allattorsimaffiannit peernissaa pillugu sukkasuumik aalajangerpunga, assartuinermut ministerim Grant Shapps nalunaarpoq.

AAMMA ATUARUK Corona: Jyllandip avannaaneersut kommunit killeqarfii qaangeqqusaanngikkaat

Taama aalajangerneq Danmarkimi piffissami kingullermi pissutsit eqqarsaatigalugit pinaveersaartitsinermik tunngaveqartoq nalunaarummi allaqqavoq.

- Coronavirusip minkeqarfinni tuniluuttorujussuanngornera, virusillu ilaat sumiiffinni inuiaqatigiit ilaannut siaruaassimasoq, Danmarkimi peqqissutsimut oqartussat ilisimatitsissutigereerpaat. Tamatuma malitsigisaanik peqqissutsimut siunnersortiunerup pinaveersaartitsisoqarnissaanut Danmarkimut tikittut tamarmik ulluni 14-ini angerlarsimaqquneqarnissaat kaammattuutigaa, assartuinermut ministeri allappoq.

Angerlarsimaqqusaanissamik piumasaqaat qanoq sivisutigisumik atuussanersoq ilisimatitsissutigineqanngilaq.

Danmarkimi minkit tamarmik toqunneqassasut Danmarkip ministeriunerata Mette Frederiksenip sapaatit akunnerata ingerlanerani nalunaarutigaa. Coronavirusip allanngortunik kinguaasiorsimanissaanut ernumaneq tamatumunnga pissutaavoq. Minkeqarfiit amerlanerpaat Jyllandip avannarpasissuaniipput.