Danskit arnartaat assammik arsartartut franskinut ajugaasut
Danskit arnartaat franskinut unamminerminni 20-nik ajuussaqarlutik ajugaapput, franskit 18-inik ajuussaqarlutik ajorsartut. Danskit arnartaat pissartanngorniutivinnissamut anngunniunnerminni Norge, Holland Serbialu unammisussanngorpaat, massa franskit arnartaat ingerlaqqinngitsoortut.
Ajuuffissiamiittup Sandra Toftip ajuutitsinaveersaarluarnera ajugaanerannut pissutaavoq, taamaattumik danskit arnartaasa sungiusaasuat, Klavs Bruun Jørgensen, sungiusartagaalu tulluusimaarutissaqarluarput.
Danskit franskillu arnartaasa assammik arsarlutik nunanut allanut unammisartui - nunarsuarmi arnani assammik arsartartuni sallersaasartut siornatigullu pissartanngorniuteqataasarnerminni taama siusitsigisukkut tamaviiaarsimanngisaannarsimasut - ilimagineqareersutut pissanganarluinnartumik unammipput.
Tamanna arsarluarpallaannginnerannik kinguneqaraluartoq Kumamotomi timersortarfissuarmi pissangarluinnartumik unammimmata isiginnaartut avaalaqattaaqaat.
Franskit uippallerujussuartut
Franskit saassussillaqqissorujussuusarsimasut unamminertik annerpaartaani saassussisarnerminni uippallerujussuaqattaarput.
Arsaq annaasaqattaarpaat, iluatsinngitsoortakkaminnik ajuuteriaqattaarputSandra Toftillu arsamik unitsitsisarneri imaaginnavillutik.
Nunarsuarmi pissartat unamminermi minutsini 15-ini siullerni marloriaannarlutik ajuupput, unamminerisalu immikkoortuisa siulliat 9-7-imik inerneqarnera pissanganarluinnartumik unamminerannik ersersitsivoq.
Franskillu ajuutitsinaveersaarluarnerat pissutigalugu danskit tamatigut iluatsittanngitsunik ajuuteriaqattaaraluarput.
Unillatsiareeramilli tamaviaaqqilerput, Alexandra Lacrabèrelu unamminerisa naammassinissaanut minutsit sisamaannaanngortut 16-17-eraartitsilluni ajuummat unamminerat pissanganarserujussuaqqippoq.
Unammisut naligiiginnarsimasuuppata franskit ingerlaqqissimassagaluarput, Sarah Iversenilu unamminerup naammassinissaanut minutsit marluk sioqqullugit peersitaammat ajugaanissaat qularnarsigaluarpoq.
Danskit pissartanngorniutivinnissamut anngunniunnerminni norskit siullertut sapaatiuppat unammissavaat. Unamminerat KNR2-kkut soorunami aallakaatinneqassaaq.