Danskit aningaasanut inatsisissaannu tunngatillugu nunatsinnit ilaasortaatitat suleqatigiinnialersut

Nunatsinniillu Inuit Ataqatigiit Siumullu sinnerlugit Folketingimut ilaasortaasut isumaqatigiinniarnerni suliaminnik ataqatigiissaariniarlutik isumaqatigiissuteqarsimapput.
 
- Folketingimi ilaasortaasugut marluusugut iliuusissatigut ataqatigiissaareqatigiinnitsigut Nunatta nukittunerpaamik inissisimanissaanik qulakkeerinninnissarput nuannaarutigaara, Sara Olsvig oqarpoq, taanna IA-mp siulittaasuatut suliassani nutaat pissutigalugit Folketingimi ilaasortaanini sinniisussaminut Johan Lund Olsenimut sapaatit-akunnerata tulliani tunniutissavaa.

- Ataatsimoorutta nukittunerpaassaagut, Sara Olsvigilu folketingimiigunnaartussaammat suleqatigiinneq nangillugu Johan Lund Olsenip suleqatiginissaa qilanaarivara, Doris Jakobsen Siumumeersoq oqarpoq. Danskit aningaasanut inatsisissatut siunnersuutaat saqqummiunneqarmalli Inuit Ataqatigiit Siumullu folketingimi allaffeqarfii aningaasaliissutissarpassuit misissuataarlugit alappussimapput.
 
- Danskit aningaasanut inatsisissaanni aningaasaliissutissanut sorsuutissagut suli arlaqarput. Pingaartumik eqqartuussiveqarnermut pinerluuteqarsimasunullu isumaginnittoqarfimmut, kiisalu illersornissamut Issittumut allatigullu tunngasutigut, Sara Olsvig oqarpoq. Taanna Folketingimi suliami kingullersaattut Issittumi inatsisartunut ilaasortat Canadami ataatsimeersuarnissaannut peqataajartorluni ippassaq aallarpoq.
 
Doris Jakobsen taamalilluni Inatsisissatut siunnersuut Folketingimi ullumi siullermeerneqalerpat Nunatsinnit ilaasortaatitanit kisiartaassaaq.

- Isumaqatigiinniarnissani sammisassagut naammattorsuupput, Doris Jakobsen oqarpoq.