Danskit aningaasaliinerisigut Kalaallit Nunaata aningaasaqarnera pitsaanerulersinneqassaaq
Folketingimi talerperliit Dansk Folkeparti siuttoralugu Kalaallit Nunaata aningaasaqarniarnikkut inissisimanerata ernumanartoqarneranik suaartaateqaleruttortut, Folketingimut ilaasortap Doris Jakobsenip Siumumeersup, danskit suliffeqarfiisa Kalaallit Nunaanni suliffissuaqarnermut, aamma aatsitassarsiornermut tunngatillugu, aningaasaliisinnaanerat eqqaasitsissutigaa.
- Isumaqarpunga Naalakkersuisut aningaasaqarniarnermut tunngatillugu akisussaassusermik angisuumik takutitsisimasut. Aamma ippassaq oqalugiaateqarninni oqaatigisattut (aaqq., aningaasanut inatsisissaq pillugu oqallinnermi) danskit suliffeqarfiisa Kalaallit Nunaanni aningaasaliinissaat neriuutigaarput, tamanna arlaatigut aallartisaanissamut aqqutissat ilagisinnaammatigit.
Kalaallit Nunaata aningaasaqarnera sanngiitsuusoq ilumoorpoq. Kisianni aamma taama ajortiginngilaq, KNR-imut oqarpoq.
AAMMA ATUARUK Dansk Folkepartiip Nunatsinnut "ikiorsiiniarnera" Olsvigip iluarinngilaa
Doris Jakobsenip Sara Olsvigillu IA-meersup Søren Espersenip (DF) Kalaallit Nunaata aningaasatigut ikiorserneqartariaqarneranik oqaaserisa isumaqatiginngilaat. Kalaallit Nunaata ukiunut tullernut missingersuutissaata amigartooruteqarfiunissaannik naatsorsuuteqarnermik, Danmarkip ataatsimoortumik tapiissutaasigut allanngortinneqarsinnaanngitsunit, aallaaveqarpoq.
Kalaallit Nunaata li aningaasaqarnera Kalaallit Nunaata nammineerluni akisussaaffigaa, tamannami Namminersorneq pillugu inatsimmi isumaqatigiissutaavoq, Siumut IA-llu Folketingimut ilaasortaatitaat taama erseqqissaapput, tamannalu danskimi politikerit ataqqisariaqarpaat.
De Radikale: Danskit suliffeqarfii danskit naalakkersuisuinit aqqutissiuunneqarlik
Partiip naalakkersuutitaqartup De Radikale Kalaallit Nunaannut tunngasunut oqaseqartartuata Helle Løvgrenip talerperliit akuliunniarnerat isumaqatiginngilaa. Paarlattuanik Kalaallit Nunaanni suliniutit danskit suliffeqarfiinit aningaasaliiffigineqarsinnaanissaat danskit naalakkersuisuisa aqqutissiuuttariaqaraluaraat oqaatigaa.
- Naalakkersuisut Kalaallit Nunaanni pilersitsinissamut arlaatigut aqqutissiuussinissamut periarfissanik nassaarniarsinnaanerat takorloorneqarsinnaalluarpoq. Tamanna aamma Kalaallit Nunaata Danmarkillu akornanni pissutsit pillugit allaaserikuusatsinneereerpoq, aningaasaliisarfimmik aningaasaateqarfiliornissaq ilaatigut eqaartorneqarluni. Eqqarsaatersuutigisatsinnut naapertuuttupilussuuvoq.
Danskilli suliffeqarfiisa namminersortut Kalaallit Nunaanni aningaasaliinissaannut ikiuutaasinnaasunik danskit naalakkersuisuisa tungaannit suliniutissanik tigussaasunik suli saqqummiussisoqarsimanngilaq.
Socialdemokraatit Kalaallit Nunaannut tunngasunut oqaaseqartartuata Flemming Møller Mortensenip, talerperliit Kalaallit Nunaata aningaasatigut ikiorserneqarnissaannik eqqartuinerat isumaqatiginagu ippassaq aamma nalunaaruteqarpoq.
