Danskisut radioaviisi unitsinneqarallartoq
Ullumikkut danskisut radioaviseqanngilaq, piffissami aggersumi aamma danskisut radioaviseqassanngilaq. Nutaarsiassaqartitsivimmi sulisussaqarniarneq ilungersunangaarmat danskisut radioaviiseqarunnaarallarpoq.
- KNR-ip nutaarsiassaqartitsiviani sulisoqarniarnermi pissutsit ilungersunarnerat pissutigalugu ataasinngorneq marsip pingajuannit danskisut radioaviiseqartarunnaarallarpoq. Aallakaatinneqartarnerata qaqugu aallarteqqinneqarumaarnera suli nalunarallarpoq, KNR-imi pisortaagallartoq Bjørk Lange Olsen, oqarpoq.
Kalaallisut radioaviisi, Qanorooq kiisalu nittartakkatigut nalinginnaasumik nutaarsiassiisoqartassaaq. Pissutsit ajuusaarutigaagut, paasinninnersilu qujassutigalugu, taanna oqarpoq.
Sulisut sulinerminnik unitsitsisut
Nutaarsiassaqartitsivimmi atorfeqartut sulinertik sisamanngornermi ullaakkut unitsippaat. Taakku sulinerminnik unitsitsinertik sulinissamut tatisimaneqarnermik pissuteqartoq tusagassiuutinut nalunaarummi allappaat:
”KNR ukiuni kingullerni sulisoqarnikkut ilungersuangaatsiarpoq. Ukiortaarlu aallartimmat tatisimaneqarneq suli annerulerpoq, sulisut arlallit suliffimminnit soraarput imaluunniit uippakajaarneq pissutigalugu napparsimallutik sulinngiffeqalerput, tamannalu pissutigalugu sulisut sinneruttut suliaqarnissamut annerusumik akisussaaffeqalersinneqarlutik. Sulisut sisamat maanna inuit aqqaneq-marluk suliassaannik suliaqartariaqarput”.
”Tamanna pissutigalugu suliassagut akisussaassuseqartumik suliarisinnaanngilagut. Tusagassiornermik suliaqarnitta pitsaassusaannut inuillu suliaqartut peqqissusaannut tamanna sunniuteqarpoq. Sulinissamut tatigineqarneq annertoorujussuuvoq”.
Sulinermi tatigineqarnermut oqilisaaneq
Pisortaagallartup, Bjørn Lange Olsenip nutaarsiassaqartitsivimmi sulisut sulinerminnik sisamanngornermi unitsitsinerat akuersaarneqarsinnaannginnerarlugulu isumaqatigiissutinut unioqqutitsinerarpaa.
”KNR-ip qullersaasa aaqqiissutissat arlariit sulisut pineqartunut sulinerminni artukkigaanerannik oqiliallatsitsisinnaasut aallartittareeraluarpaat, aammalu pineqartunik oqaloqateqarnerit ingerlatereerlugit. Nutaarsiassaqartitsivimmi sulisut inunnik tallimanik KNR-imi immikkoortortani allaneersunit ilaneqareerput, aammalu radioaviisip danskisuup ilanngarneqarluniluunniit matuneqarallarnissaanut periarfissaq ammatinneqaraluarluni. Sulisulli pineqartut suliumajunnaarnissamik isummernerannik allanngortitsinissamut tamakku iluaqutaasimanngillat”, qullersat tusagassiuutinut nalunaarutaanni allassimavoq.
Sulisut tallimanngormat suliartoqqipput.
Sulisoq ullaakkut nalunaaqutaq 05.30 kalaallisut radioaviisertitsiartorluni suliartortoq suleqatiminit suliatigut siunnersorneqarsinnaanissamut periarfissaqartinneqassasoq aalajangerneqarpoq.
Bjørk Lange Olsen KNR-imi pisortaasimasup, Annga Lyngep KNR-ip siulersuisuinit januaarip 31-ani suliunnaarsitaanerata kingornali pisortaagallalerpoq.
