KNR-ip pisortaa Annga Lynge angerlartitaagallartoq

Annga Lynge tusagasssiorfimmit angerlartitaagallartoq siulersuisut siulittaasuata paasissutissiissutigaa.

Allattoq Ivik Kristiansen

januaarip 31-at 2025 14:54

Annga Lynge ukioq ataaseq sinnilaarlugu maanna pisortaareertoq taamaattoqarpoq.

Tamanna KNR-ip siulersuisuisa ullumi ataatsimeereerneranni paasinarsivoq.

Aamma atuarukKNR-ip siulersuisuisa siulittaasumi tunuareernerani akisussaaffik naalakkersuisunut ingerlateqqippaat

Siulersuisuni 2024-mi septemabarimili siulittaasoq, Nukaraq Eugenius taama paasissutissiivoq.

- KNR-ip siulersuisuini ullumi ataatsimiippugut, taavalu ataatsimiinnitsinni KNR-imi pissutsit eqqartorlutigit. Tassanilu siulersuisut aalajangerput, pisortaq angerlartinniarlutigu, Nukaraq Eugenius oqarpoq. Allamik maanna oqaasissaqarnani oqarpoq.

Sulerususseq pillugu ajornartorsiutit

Annga Lynge KNR-imi pisortatut 2023-mi atorfinippoq. Atorfittaaminilu suliassai amerlapput. KNR-imi sulisussarsiornermut, sulisut sulisoriinnarnissaannut, napparsimakulasoqarneranut stressertoqartarneranullu tunngasunik ajornartorsiorfiuvoq.

Taamaammat pisortanngorami ajornartorsiuterpassuit iluarsiiffiginiarlugit taamani neriorsuivoq.

- KNR-ip suliffittut orniginarsarnissaanut suleqataarusuttorujussuuvunga, Annga Lynge atorfininnerminut atatillugu oqarpoq.

Aamma atuaruk Journalistformand: Tusagassiortut siulittaasuat: KNR-ip aqutsisuinit takorluukkat amigarnerat nutaarsiassaqartitsinermik ikilisaataavoq

Suliffimmili atukkanik taamanimiilli misissuinerit inerneri pitsaanngillat.

Taama misissuineq kingulleq 2024-mi ukiakkut naammassivoq, tassanilu KNR-imi immikkoortortaqarfinni tamani sulisut sulerusussaat appariarujussuarsimavoq. Ingammik aqutsisunut qullersanut tatiginninnermut apeqqut pitsaanngitsumik inerneqarpoq.

Bjørk Lange Olsen pisortatut manna atorfeqarallarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.