Danskisut innuttaassusilik Bosniami tigusaaqqasoq

Bosniami illoqarfiup Pale-p qaqqaani angalaartoq tigusarineqarpoq, Danmarkip Radioanit ippassaq tamanna tusarliunneqarpoq.

Internetikkut nittartakkami, Sarajevo X-imi, allassimasoq malillugu, angut taanna, ilaquttami ilaat 16-inik ukiulik ilagalugu, sakkunik, tassa illuinnarsuutinik pingasunik, aallaammik ataatsimik imassanillu sakkortuunik nassarluni qaqqami sooq angalaarnersoq, politiit maanna paasiniarpaat.

Angut qallunaaq 33-nik ukiulik alianartumik marlunngormat ajunaarpoq, taanna Javorinami qaqqamiit nakkakattarpoq, unalu pisoq tassunga attuumassuteqarsorineqarpoq.

Angut ajunaartoq, angutillu taakku marluk inerteqqutaasunik sakkulisartutut maanna tigusaasut, ilaqutariiullutik Bosniami feriarsimagunarput.

Sarajevomi aallartitap, Kirsten Gilanip, Bosniami tusagassiorfiit tusarliutaat ilumoornersoq uppernarsarsinnaannginnerarpaa. Oqaatigiinnarsinnaavaaligooq ajunaartoqarnerata kinguneranik angut qallunaaq killisiorneqartoq.

Ajunaartoqarmat qallunaat namminneerlutik politiinut kalerriipput, aallartitaqarfillu namminneq aamma attaveqarfigaat.